Avemu amparatu pocu fà ch’ella sarebbe presente in Corsica a spezia a più gattiva per l’alivi è a vigna di a Xylella Fastidiosa.
A cusì detta « Pauca »… quella ch’hà stirpatu decine di millaie d’alivi in Italia. Nadine Nivaggioni, pè u gruppu Femu a Corsica hà chersu nutizie à Agnès Simonpietri, a presidente di l’Uffiziu di l’Ambiente, dumandènduli di mette l’accentu nant’à a minaccia à l’uccasione di l’Assisi di a Biodiversità, induv’ellu s’aspetta a secretaria di u Statu, Brune Poirson, mandata da u ministru di a transizione eculògica, Nicolas Hulot. « I Corsi dèvenu cunnosce a verità » dice Nadina Nivaggioni. • Eccu a so dumanda à a bocca à Agnès Simonpietri chì risponde in quant’à ella à e dumande d’Arritti.
A dumanda di Nadina Nivaggioni:
Madama a Presidente, A locu à trè anni d’incertezza in quantu à a presenza di a Pauca in Corsica, un laboratoriu di ricerca accerta avè trovu u battèriu nantu à una leccia, dapoi un annu è mezu.
Or dunque, l’autorità cumpetente in matèria sanitaria ci anu piattatu a verità è in tantu e misure pigliate ùn sò state manc’appena adatte à u perìculu in ballu.
Simu di pettu à una crisi ambientale maiò, è i Corsi dèvenu cunnosce a verità. Postu chì i rapresentanti di u Statu anu mancatu à e so respunsabilità, u gruppu Femu a Corsica, in mossa da u principiu nantu à’ssu rìsicu di cuntagione, vi prega Madama a Presidente di l’Uffiziu di Ambiente di :
– Urganizà senza tricà una reunione di crisi incù tutti l’attori cuncernati, di modu à truvà e vie è i mezi d’un pianu di preservazione (a tappa di a prevenzione hè digià daretu à noi), ancu se a cumpetenza ùn tocca à noi,
– Di dumandà sùbitu sùbitu l’arrestu di l’impurtazione di tutte e piante.
L’iniziativa di i pruduttori d’alivi ci hà datu a prova ch’ellu si pò luttà pruducendu da per noi,
– Di mette a prublemàtica di a Xylella à u centru di i dibattiti di l’Assise nantu à a Biodiversità,
– Di travaglià à u livellu aurupeu per chì’ssu rìsicu di catastrofa ambientale, agrìcula è turìstica à vene sia ricunnisciutu da e più alte autorità è chì e responsabilità di non assistenza sìanu poste.
A ringrazià vi, Madama a Presidente ».
A risposta di l’Uffiziu di l’Ambiente
(intervista)
Hè vera ch’ellu s’hè trovu u battèriu «Pauca» in Corsica?
Nadina Nivaggioni hà a raghjone, in l’affare di a Xylella si pò disgraziatamente affirme ch’è no ci n’andemu da Caccia à Niolu è ch’ella hè stata tinuta piatta a virità ! Un casu di a sottuspezia « Pauca » hè statu scupartu in Corsica in lu 2016 nantu à una lèccia : hè statu publicatu di ghjinnaghju scorsu da u labburatoriu di ricerca di l’INRA d’Angers chì l’hà idintificatu. Cirtezza ùn ci ne sarà mai nantu à u stirporiu di stu casu di «pauca», listessa o nò à quella di a Puglia taliana, datu ch’ella hè morta a leccia. U pinseri maiò vene da u fattu chì stu casu ùn hè sicuramente sulignu è chì, sinu ad avà, a lèccia ùn era conta in lu listinu di e piante sinsìbbule à a Xylella «pauca ».
Ci serà un perìculu per l’alivi ancu ind’è noi?
Certi alivi di e Baliare sò malati par via di a sottuspezia «multiplex», è dicìanu appuntu chì, à l’alivi, ùn li si pudia appiglià. Ramentu chì sta sottuspezia di u batteriu hè quella chì ghjè largamente sparta in Corsica. Hè un infurmazione capitale.
Po si sparghe in Spagna dinù…
Hè stata trasmessa una alerta da a Spagna à l’Auropa di marzu scorsu: a Spagna hà fattu sapè à l’EFSA (Agenza sanitaria aurupea) chì certe piantine cuntaminate èranu isciute da l’Andalusia à via di l’Auropa sana ; certe sò state ritrove ancu in Cecchìa. St’alerta ùn hà cagiunatu nisuna ricerca di i lotti cuncirnati.
A nigazione di ste infurmazione da u Statu hà parmessu à i so servizii di francàssila d’una mudìfica di l’anàlisi di i rìsichi ligati à l’orìgine di e piantine impurtate (sò solu difese d’entre e piantine d’Italia) è di cuntinuà à attribbuì parmessi d’impurtazione di piantine ghjunte da a Spagna; par vìa di derugazione accurdate di modu massicciu da mesi è mesi, cumprese e spezie più arrisicate, tal’è l’alivu, u loru, ecc…
Di modu stupendu, u Statu a li dura à cunsidarà chì a Spagna ùn hè micca una nazione à rìsicu!
A minaccia hè grave?
U battèriu hè prisente in Corsica, largamente spartu è a situazione vene di fatti gravìssima, cun cunsiquenze putinziale pròpiu trimende nantu à l’arburatura è e filere agrìcule. Ci hè dunque da tuccà à dà pettu à una crisi tamanta.
Chì ci si pò fà!
Innò ch’ellu ùn si parli di vulè calà e bracce!
I nostri spizialisti lucali (cunsirvatoriu butànicu, Inra, Università) ma al di là i scintìfichi di l’Inra, quelli di u labburatoriu d’Angers, spizialisti di a biulugìa mulicularia di u battèriu, ch’è no avemu cunsultatu, sò tutti assulatamente furmali: ci vole invece à rinfurzà à tuttu pattu a prutizzione di a nostra ìsula per chisià l’intrata d’altre sottuspezie (par indettu quella « fastidiosa », chì s’appiccica à a vigne in e Baliare), ancu di più dannìfiche è chisià u riaccoppiu di stirporii affaccati da lochi sfarenti è chì s’appigliarìanu ad altre spezie.
Chì misure ci tocca à piglià allora?
1) Ci vole à vultà à l’appiigazione stretta di a difesa d’impurtazione di piantine di spezie dette sinsìbbule, listinu ch’ellu ci vole à rivisà in cuntinivu.
2) Accorre à sicurizà senza altru e sole impurtazione chì ci hè manera di falla, volesi dì e piantine di e vigne (trattamentu tèrmicu).
3) Ci tocca à cresce l’aiuti à i virduristi chì prudùcenu sopra à locu.
4) Ci vole à mette in piazza un prugramma di test sistemàtichi di varietà chì pudarìanu esse « tullarente» à u battèriu, anzituttu per l’alivi.
5) Avemu da appruntà à a lestra una pruposta di statutu particulare di prutizzione di a biudiversità di l’ìsule arrimbènduci à u mudellu oltrimarinu.
Chì dumandemu à u Statu?
Ch’ellu metti in òpara in lu casu ch’è no parlemu u principiu di pricauzione enunziatu da l’artìculu 5 di a Càrtula di l’ambiente, chì quella hà valore custituziunale, senza sottustimà i rìsichi nè lascià sviluppassi una crisi sanitaria irrivirsìbbule, chì ne pagarìamu e pene di modu cullittivu è chì e cunsiquenze nimu hà in tantu i mezi di pudelle misurà…