«L’Affaire du siècle » hè ssa dimarchja chì hà adunitu parechji urganìsimi per purtà u Statu in tribunale per vìa di a so inazzione contr’à u riscaldimentu climàticu. Si scrive in e dimarchje mundiale pè u climà è adunisce dapoi u 2018 a Fundazione Nicolas Hulot pè a Natura è l’Omu, Greenpeace France, Notre Affaire à tous è Oxfam France. Ssa dumanda di « ghjustizia climàtica » hè stata appughjata da a Federazione Naziunale d’Agricultura Biològica, a Fundazione Abbé Pierre, France Nature Environnement, l’Associu Naziunale di Prutezzione di l’acque è i fiumi, è da una petizione ch’hà racoltu più di 2 millioni è trè centu milla ziffre, per dì chì u Statu ùn hà micca empiutu l’ingaggiamenti presi per riduce e so emissioni di gaz à effettu di serra à favore di a biodiversità. Dapoi, più di 40 altre urganisazioni o cullettivi anu sustenutu a dimarchja. È cusì, u 3 di ferraghju scorsu, u tribunale hà cundannatu u Statu francese ricuniscendu ch’ellu ùn avìa micca fattu ciò ch’ellu ci vulìa per luttà contr’à e so emissioni di gaz à effettu di serra. Hè un avvanzata stòrica ind’è a lotta contr’à u ciambuttamentu climàticu. « I ciambuttamenti climàtichi sò quì, tòccanu e nostre vite è nimu ùn hè risparmiatu. A crèscita di l’acque, a strughjitura di e ghjaccie, a multiplicazione di l’evenimenti meteorològichi stremi, a sparizione di e spèzie animale è vegetale, e nostre splutazioni agrìcule in perìculu, l’aria chè no rispiremu pulluatu, u prezzu di e nostre fatture energètiche, dipertuttu, in i paesi di u Sud cum’è in i paesi di u Nordu, e pupulazioni débule sò e più tocche » dice « L’Affare di u sèculu ».
Ssu marti u 6 d’aprile, hà postu elementi scientìfichi è ghjuridichi novi da permette à i ghjùdici d’impone misure precise à u Statu. « L’Affare di u Sèculu » hà cusì postu un raportu d’una centinaia di pàgine per dì cum’è u Statu pò richjappà u ritardu presu per rispettà i so obbiettivi di riduzzione di gaz. Li ci vole à sviluppà i trasporti ferruviari, indità u parcu automòbile francese ver di veiculi di poca emissione, sustene a mubilità dolce, rinuvà 500.000 alloghji tutti l’anni, richjappà u ritardu presu in quantu à a rinuvazione energètica, aumentà i spazii agrìculi cunsacrati à u bio, riduce a cunsumazione d’ingrassi, riduce a cunsumazione di carne, avè un cuntrollu cuttighjatu di a pulìtica climàtica di u paese. Cose puru accessìbile ! Pàrenu fole di duvè ghjùnghjenne à purtà lagnanza in ghjustizia per chì u Statu s’impegna cum’ellu ci vole ! « L’Affare di u sèculu » insiste nant’à a necessità d’agisce, cum’ellu l’hà detta dinù u tribunale : « u non rispettu di l’indiatura chì u Statu s’hè datu per ghjunghje à ss’obbiettivi pruvucheghja nove emissioni in più di gasu à effettu di serra chì s’accatastèghjanu è ch’anu da pruvucà effetti à longu à u tempu di vita di ssi gasi ind’è l’atmosfera, vale à dì circa 100 anni, impeghjurendu u preghjudiziu eculògicu. »
A rispunsabilità di u Statu hè stata ricunnisciuta. Avà, u tribunale deve impòneli e misure da mette in ballu. Aspettendu, « L’Affare di u Sèculu » ùn cappia nunda. •