Felice Benedetti purterà u braccialettu elettrònicu. Cusì hà dettu a Càmera d’appiecazione di e pene di Parigi chì duvìa decide di a manera d’accuncià a fine di a so detenzione. Tantu megliu. Ci sò stati, ammentàtevi, parechje manifestazioni per dinunzià a ripressione accanita di a Precura. Felice Benedetti hè statu cundannatu à cinque anni di prigiò in 2017 è era liberèvule dapoi quist’annu, ma a Precura avìa dumandatu u ritornu in detenzione, allora chì u ghjùdice d’appiecazione di e pene, di ghjennaghju, avìa dettu ch’ellu bastava u braccialettu. U precuratore avìa postu un ricorsu di pettu à a Càmera d’appiecazione di e pene, ch’hà presu dunque a decisione definitiva. Felice Benedetti compierà a so pena di prigiò in casa, sott’à u cuntrollu di u braccialettu elettrònicu. Eccu. •