I Fratelli Vincenti

À u Duttore Simeoni

Saparete o Sgiò Duttore

Chì s’è cambiu di scrittura

S’ell’hè d’un antru culore

A vogliu più di primura.

Quandu aghju ascultatu à voi

In Aleria fucosa

Di scopre un omu cù noi

À mè m’hà fattu calcosa.

Dicu cù noi altri Corsi

Inghjuliati sempre muti

Razzi di l’ùltimi sforzi

Appena ricunnisciuti.

Cù parolle assicurate

È di tonu seccu è fermu

L’ate tutte misurate

E piaghe di u guvernu.

C’era parechji fucili

Ma ind’è noi hè cum’è un usu,

Stàvamu à sente tranquilli

U raggiunamentu infusu.

Ci appruntàvamu à fà festa

U muvimentu era natu,

Quand’un armata troppu lesta

Tirendu l’hà cundannatu.

Piengu quellu ch’hè cascatu

Anc’oghje a dicu franca,

Quant’è quellu ch’hà tiratu

Cridèndusi for’di Francia.

Cunniscendu u sangue corsu

È per fallu andà di male,

Era pronta à u so postu

A pulizza speciale

Quellu chì a ci hà mandata

A sapìa di sicuru

Ch’ella era una schiaffittata

À u pòpulu maturu.

Erate pariculosu

È sentu i capizzoni,

Di Parigi pinserosu

Dì : qual’hè stu Simeoni ?

D’un pòpulu discitatu

L’idea s’ella ùn si pare,

Per un altru incatinatu

Vene ancu à francà u mare.

È u nostru si svigliava

In Aleria issu ghjornu,

È nisunu ùn s’aspittava

À issu colpu di tratornu.

A ghjustizia chjamata

À nome d’una bandera

L’anu prestu incarcerata

Senza mèttesi visera.

In Bastia in piena villa

S’hè vistu chì brutta cosa !

Eiu mi vargognu à dilla

In postu una mitragliosa.

A Ripùblica issa mamma

Ella ch’hà tanti figlioli,

Hà persu di a so fiamma

Pè i nostri paisoli.

Allora si sò arritte

Più sanguigne d’altre forze

À difende si so scritte

E nostre ràdiche corse.

Cascatu ind’è una manuvra

Per falli piglià i torti,

U paese di a muvra

Hà minatu colpi storti.

L’affrontu chjame risposta

Solu à quellu chì l’hà fattu

A superba mai imposta

È sempre à fronte scupartu.

S’elli sò nati l’eccessi

S’elli ci sò i nucenti,

O Corsi ti ne cunfessi

A pòrtanu i putenti.

Hè più fàciule di scrive

Cà di ghjùnghjene à i fatti,

Ma quandu e forze sò vive

Ùn ci hè nimu chì si piatti.

Cum’è voi o Sgiò Duttore

Per fà l’ùltima tribbiera

Quandu cù un certu rimore

Ci chjamàstite in Aleria…

Vincenti – D. Isola.

Arritti ringrazia à Anna Maria Orticoni, figliola di Dumènicu Vincenti.