I Corsi è a granda guerra

Aiò zitelli !

« Aiò zitelli » conta a stòria di Ghiseppu Gabrielli, suldatu corsu, fucilatu, è di u s’amicu, Lucianu Casalta. U realisatore riesce à cuntacci ssa stòria d’un’inghjustizia tamanta.

Mumentu d’emuzione cummuvente, ghjovi sera à l’Assemblea di Corsica. U filmettu, cortu metratura, di Ghjuvan’Maria Antonini, « Aiò zitelli » hè statu diffusatu à l’eletti aduniti in sessione. Èranu presenti, u realisatore, ma dinù Jackie Poggioli, autore cinque anni fà di u filmu documentariu « Fucilati in prima lìnea ».

Ghjuvan’Maria Antonini. U rialisatore. Ci face risente a ferita ch’ella hè sempre avà, di i fucilati in prima linea.

S’agisce d’una parte dulurosa di a stòria umana. Durante a grande guerra, sò morti millioni di zitelli luntani da u so paese. Frà quessi, in Francia, sò morti è ùn sò stati ricunnisciuti cum’è «morti à u fronte » decine di ssi ghjuvanuttoni, fucilati per avè abandunatu u so postu. In fatti, suvente, ùn capìanu micca l’òrdine di i so superiori, perch’elli èranu paisani brittoni, corsi, alsaziani, o senegalesi è ch’ùn capìanu un acca di a lingua francese.

Èranu ghjudicati di manera arbitraria è fucilati cum’è cani.

L’Assemblea di Corsica dapoi un pezzu a riabilitazione di i ghjòvani Corsi.

Certi, feriti, sturduliti o svenuti un tempu nant’à u campu di guerra, s’èranu persi sott’à a mitraglia. Di ritornu in a so cumpagnìa qualchi ghjornu dopu, èranu incapaci di dì induv’elli èranu passati tuttu ssu tempu. Senza pudè spiecassi, senza prucessu degnu, senza avucatu à le volte, èranu ghjudicati di manera arbitraria soprapiazza, è fucilati cum’è cani. I soi, in più di u dulore di a pèrdita di u so figliolu, u so maritu, u so babbu, duvìanu campà in più cù a vergogna di ss’accusu di tradimentu. Oghje ghjornu simu sempre ind’è u sdegnu è l’inghjustizia chì mena e famiglie, generazione dopu à generazione.

«Aiò zitelli » conta a stòria di Ghiseppu Gabrielli, suldatu corsu, fucilatu, è di u s’amicu, Lucianu Casalta. In qualchi minuti, u realisatore riesce à cuntacci ssa stòria d’un inghjustizia tamanta, è ci face risente a ferita ch’ella hè sempre avà.

L’òpera hè magnifica.

L’Assemblea di Corsica s’hè già interessata parechje volte à ssu fattu di stòria è dumanda dapoi un pezzu a riabilitazione di i ghjòvani Corsi, da ch’elli ripòsinu in pace. Cum’ella ùn vene micca, parte di Parigi, ssu ghjovi 24 di sittembre, l’Assemblea di Corsica hà adupratu una risuluzione per prununzià di manera simbòlica è sulenne ssa riabilitazione.

U scopu hè di scuzzulà u Statu è a sucetà francese da ch’ella si movi nant’à ssu sughjettu dulurosu di a so stòria. Da rende onore à tutti ssi ghjòvani morti duie volte. In guerra, luntani da i soi, è sott’à e palle di a so pròpia armata.

 

Fabiana Giovannini.