S’hè spentu u nostru amicu, sustegnu fidu d’Arritti, u nostru pueta, Andria Brignole, à l’età di 90 anni. Andria hà publicatu mondu puesìe nant’à Arritti.

Parechji libri sò esciuti. Era u so piacè, a scrittura ! Andria era un militente di a càusa corsa, appassiunatu di a lingua corsa, di a stòria, di e lotte è bramava pace è libertà pè u so paese tant’amatu. Averà pussutu tuccà ss’allegrìa tamanta di a vittoria nanzu di parte à fà l’impruvisate in Paradisu. Ci hà raghjuntu a so sposa cara, Pasqualina. À i so figlioli, figliulini, nipoti è niputini, tutta a so famiglia è l’amichi, Arritti manda cundugleanze afflitte. Riposi in pace o’ndrìa !

 

 

 

Teni forte lingua corsa  Andria Brignole

 

Teni forte lingua corsa teni

testa à i to predaghji

Quelli chì di u francese si sò

fatti l’avucati

Fà chì tanti giacubini li si

ròmpinu i denti

Quandu vòlenu evucà chì tù

porti incunvenienti.

Sì no vulemu stà Corsi tene a

nostra identità

Ci vole no pàrlimu corsu

parlallu è fallu parlà

Fà chì sta lingua materna ùn

varghi in perdizione

È cusì ùn esse più Corsi solu

chè per illusione.

Sì no vulemu stà Corsi ci vole

ch’o siamu sinceri

Sinceri cun noi stessi è forse

ancu severi

Ùn lascià i nostri figlioli parlà

solu chè francese

Sottu intesu chì sta lingua

ghjè assai più curtese.

Sì no vulemu stà Corsi

bisognu ch’alzimu u capu

Ùn fà nostre tante mode

ch’o subimu senza laziu

Fà capisce à tanta ghjente chì

si volenu stallà quì

Chì ghjè à elli d’accunciassi

invece facci subì.

A ricchezza di sta lingua

ormai hè ricunnisciuta

Fora di e nostre cunfine ancu

duve ùn hè capita

Solu a Francia cum’è sempre

di spìritu assai strettu

A vole vede smarrisce per

ottene u suttumessu.

Teni forte lingua corsa è fà

chì e to spressione

Pòssinu corre e strade tantu

chè e to canzone

Fà chì vechji è zitelli dumane

pòssinu esulte

Cantendu à alta voce e to

note e più ghjuste.