ARRITTI s’unisce à A Piazzetta per rendu umagiu à ss’omu ch’hà sappiutu fà ride i Corsi di sè stessi. Una prudezza ! A so inchiesta corsa hè un òpera suchjulente, un spechju d’un èpica puru dulurosa induv’ellu hà sapiutu cù a punta di a so mina è cù u so spìritu stuzzicaghjulu, cuntà quant’elle èranu ridicule certe situazioni.
Brittonu innamuratu di a so terra, Rinatu Petillon s’hè ghjucatu di a mina da chjucu è, puru malatu, hà fiurittatu sin’à u so ùltimu fiatu.
Furmatu per esse pastizzeru, hà delusu i so parenti vulendu campà da i so disegni. Puru hà ricevutu parechji premii, u grande premiu d’Angoulême in u 1989, u grande premiu di « L’Humour vache» in 2002, u premiu di u festivale internaziunale di u disegnu di stampa di Saint-Just le Martel… S’hè spentu à l’età di 72 anni. Ch’ellu riposi in pace.