Ghjocu à pallò

Scambiu corsu è sardu

U 2 di ghjugnu pròssimu à 8 ore è mezu di sera in Olbia, un scontru di sìmbulu forte si ferà trà Corsica è Sardegna. A Squadra Corsa di ghjocu à pallò è a Natzionale Sarda di Calcio s’anu da sfidà per vince u trufeu «Edimondu Simeoni è Antoni Simon Mossa ». Un bellu scàmbiu trà e duie ìsule surelle !

Sìmbulu di a fratellanza trà Corsica è Sardegna. Sìmbulu di a vuluntà di ricunniscenza di e duie ìsule è e so squadre di futball à u livellu internaziunale.

Sìmbulu per vìa di u trufeu stessu, dedicatu à dui umoni di e nostre lotte. Edimondu Simeoni chì hà sempre sustenutu a Squadra Corsa, u scàmbiu trà e nazioni in brama di libertà, è u bisognu d’internaziunalizà a lotta di u pòpulu corsu. Sparitu u 14 di dicembre scorsu, ci accompagna in ogni passu di lotta, da a so indiatura, i messagi forti d’umanìsimu è di libertà ch’ellu ci hà lacatu. Ferma un esempione pè e nove generazioni. Antoni Simon Mossa hè un sardista di manca, natu in a cità catalana d’Alghero è ch’hà sempre difesu e so duie identità, catalana è sarda. Militente di u Partito Sardo d’Azione ind’è l’anni 60, hà fundatu Sardigna Lìbera in u 1964.

Difensore di l’identità sarda, cumunità stòrica, di lingua è di cultura pròpia, hà dinunziatu u culunialìsimu talianu. Hè statu dinù unu di i primi difensore di u bisognu d’internaziunalizà a lotta indipendentista, per truvà appoghju à l’infora, fighjendu pè u più ver di a Catalogna. Hè mortu ghjòvanu di malatìa ma hà indidatu a strada sardista. A brama di scambiu trà e duie ìsule hè forte à livellu culturale, ambientale, ecunòmicu, sucietale, stituziunale, ma dinù spurtivu.

À l’ora induv’ellu si parla di a scrizzione di a Corsica in a Custituzione, a ricunniscenza di a specificità spurtiva di a Corsica ùn hè micca un sognu. A Scozza, u Paese di Galla, l’Irlanda, ùn sò micca indipendente, ma sò nazioni ricunnisciute à u livellu internaziunale da pudè ghjucà grande cumpetizione cum’è a Cuppa di u mondu di u ghjocu à pallò, o e cumpetizioni internaziunale di Rugby.

È perchè micca a Corsica un ghjornu ?

A chjama hè lampata à i sustenitori. Serà l’uccasione per elli d’andà à scopre a Sardegna vicina. Ssu scontru trà e nostre duie squadre naziunale hà da esse un mumentone. Forza l’ìsule surelle !

1 Trackback / Pingback

  1. Stampa Corsa, informations corses – Scambiu corsu è sardu

Les commentaires sont fermés.