Squadra corsa – Nigeria

U scontru di a fraternità di i pòpuli !

U scontru trà a Squadra Corsa è u Nigeria s’hè compiu cù a parità 1-1. Ma ciò chì ci vole à ritene ghjè a fraternità trà pòpuli ch’hè stata torna mustrata in Aiacciu cù i bianc’è neri di a squadra naziunale!

Timizzolu ùn hè era pienu ma un bellu spìritu sparsu da i cinnini hà marcatu ssu scontru trà a Corsica è a quarantèsima squadra à a classìfica di a Federazione internazunale di ghjocu à pallò ! L’affaccata di u Nigeria hè una bella ricuniscenza pè a Corsica Football Association è a so squadra bianc’è nera, puru inghjuvanita assai, hà torna mustratu ssu 26 di maghju ch’ella pudìa esse à i livelli i più alti !

Nanzu à u scontru, 300 zitelli anu sfilatu nant’à u terrenu, sciaccamanati da u pùblicu incantatu da tutta ssa bella ghjuventù, cù bandere à testa mora è duie banderole d’un messagiu forte : « l’avvene sò eiu» d’una parte, «prighemu per Manchester » di l’altra.

Spurtivamentu, u ghjocu ellu hè statu ingaggiatu frà una squadra in piena priparazione di a Cuppa Africana di e Nazioni, è ghjucatori corsi un pocu sfiatatu da una stagione carca à desillusioni per parechji, ma puru cù u core di vulè raprisentà a so squadra naziunale ! Un bellu football dunque è una bella incertezza sin’à l’ùltima sott’à l’attache di i Super Eagles di u Nigeria di pettu à un grande Nicolas Penneteau decisivu nant’à parechji assalti !

A Corsica hà surpresa à tutti cù una voglia forte sprimata à e prime minute di a partita strappendu ancu un penalty trasfurmatu da Mandrighi ! È ancu s’ella s’hè aggruttata dopu in difesa a squadra corsa, hà risicatu u hold-up cù un bellu puntu torna s’ellu ùn era statu frischjatu un for’di ghjocu ! Ci hè vulsutu aspettà l’ottantatrèèsima minuta per vede l’ega lisazione di u Nigeria, torna nant’à un penalty trasfurmatu da Iheanacho.

In a meza ghurnata, ghjè u scontru trà ghjurnalisti è pulìtichi ch’hè statu un bell’evenimentu ancu ellu, assai disputatu cù belli punti da e duie parte !

È ghjè a stampa ch’hà vintu cù 4 punti à 3!

Ss’appuntamenti di a squadra corsa sò d’un veru livellu internaziunale è merìtanu di più interessu parte di a FIFA.

Sciaccamanemu u travagliu di a Corsica Football Association, bramendu di vede un ghjornu una squadra d’altu livellu aurupeu ùn avè paura di misurassi à a Corsica !

L’affaccata di u Nigeria hè una bella ricuniscenza pè a Corsica Football Association è a so squadra bianc’è nera, ch’hà torna mustratu ch’ella pudìa esse à i livelli i più alti !

ARRITTI.