Venezia

Battelloni… battellacci ?

Venezia vene di interdisce i battelloni in u centru cità in u bacinu di San Marcu. Periculosi, pulluente, ssi mostri strùghjenu u paisagiu è mèttenu in perìculu u preziosu è a bellezza di i lochi.

 

Oramai i battelli di crucera ùn puderanu più entre in a cità frà e più belle di u mondu, è sò custretti di piantassi in u portu di Marghera à cantu à Venezia. Dice Il Gazzettino, un ghjurnale web di u lucale, « i ministri di a transizione eculògica, di a cultura, di u turìsimu è di l’infrastrutture si sò messi d’accunsentu per svià u tràfficu di i grandi battelli di Venezia ver di Marghera. » A misura ùn hè ancu effettiva disgraziosamente, postu chì u guvernu si dà u tempu di truvà un alternativa. Un cuncorsu d’idea hè lanciatu… Da ch’ellu possi accoglie ssu tràfficu di i battelli di crucera, ci volerà à custruisce un novu terminale d’una spesa evaluata à 41 millioni d’àuri nant’à u portu di Marghera annant’à u canale industriale. Vale à dì chì ùn avemu ancu finitu di vede ssa minaccia in a laguna ! U Corriere della Sera dice ch’ellu ci volerà aspettà omancu 10 anni… Ma a decisione era bramata dapoi un pezzu chì Venezia ferma sottu à una minaccia permanente. A paura ci hè sempre di vede ripruduce l’accidente di u 2019, quandu u MSC Opera, un battellone di 2700 passageri, hà persu u cuntrollu è hà inticciatu un antru battellu, u River Countess ch’era amarratu… U mutore hè cascatu in panna, è u battellu hà sfilatu senza pudè piantassi à una vitezza di 5 nodi sin’à u ponte, sgrisgièndusi nant’à tutta a lunghezza. Ci èranu personi nant’à i dui battelli è nant’à u ponte. Ancu assai ci hè statu pocu vìttime : quatru feriti è ghjente cascata ind’è l’acqua… ma ci hè di chè à fassi penseru. Ci sò stati disguasti nant’à i dui battelli è pè u più nant’à u River Countess. Senza parlà di u rìsicu di pulluzione di fioul in a laguna !

 

I battelli di viaghju di lussu sò di più in più grandi. Ssi giganti si permèttenu tuttu per vìa di l’impurtanza ecunòmica ch’elli anu presi pè i porti, ancu sè u settore hè quasi à l’arrestu dapoi a crisa di a Covid19. Puru hè tempu d’accòrgesi ch’ella ùn hè indispensèvule à a vita ecunòmica di Venezia ! In fatti, u prublema di u turìsimu di massa in Venezia ùn ferà chè spiazzassi. Ci volerà à traspurtà cù a strada da Marghera à Venezia, a ghjente di ssi battelloni chì cuntinueranu à rèndesi in a cità. Ùn hè compiu u capatoghju !

Venezia hè vìttima di a so bellezza. Sò decine di millioni di turisti chì sbàrcanu à longu à l’annu, i passi è vene di sta ghjente è micca solu di i battelloni, si strùghjenu e fundazioni di a cità. Senza parlà di i scumudamenti cuntìnui per l’abitenti, rimori, carrughji ingumbrati, rumènzule… U turìsimu di crucera cresce di manera tremenda. Da 23,3 M di passageri in u mondu in 2015 èranu 28,2 M passageri in 2018 cù 314 battelloni, una settantina torna in custruzzione in 2020, è una centinaia prevista da quì à u 2027. Omu s’aspettava 30 M di passageri in u mondu in 2020 per un impattu ecunòmicu di più di 150 milliardi d’àuri è 1,2 M d’impiechi diretti o indiretti ! Ssi mostri marini imbàrcanu 3300 letti è i più grossi ghjùnghjenu sin’à 6000 letti ! Sò cità nant’à u mare ! Una scimatichera chì si paca caru in ssu tempu di crisa è a messa in panna di l’ecunumìa di lussu…

Infine chè, a pandemìa di Covid di sicuru hè stata un culpacciu per l’indùstria di a crucera ma hè un prò per Venezia è per l’ambiente in generale. •

F.G.