I Chjami Aghjalesi

40 anni in cantu !

Magnìficu anniversariu ch’elli ci anu rigalatu I Chjami Aghjalesi. 40 anni in cantu, à accumpagnà tutte e nostre lotte ! Trè cuncerti à a fila in Bastia, cù l’urchestru di u Cunservatoriu di Bastia, è, splèndidu, u solu è u più ghjòvanu capi d’urchestra di l’Ìsula, Marinu Leccia, 24 anni ! Una vintina di musicanti à rege, altre tante cantatori, cù tutti i più belli canti ch’anu fattu ssi 40 anni, è quasi trè ore di cuncertu, è di messagi pulìtichi ben intesa. Culunisazione chì ci affoca, terra è lingua in perìculu, immigrazione cù « u mare tirreniu culore di sangue », pòpuli fraterni, è cù apertura dinù à belle è forte intervenzioni piene di sensu è di chjama à resiste di dui militenti generosi d’ingaggiamentu : Dumè Gambini pè a priservazione di u nostru ambiente è Paulu Andria Fluxia per l’avvene di a nostra agricultura… Bellìssimi è cummuvente mumenti di lotta, di gioia è di spartera ! Ci anu rigalatu ancu qualchi scalancatu i nostri amichi aghjalesi, vera prudezza per quelli chì sanu quantu firmà sticchiti nant’à a scena face parte di a so legenda ! Hè statu un veru piacè di vèdeli pruvassi à qualchi muvimentucci di ballu… Sciaccamanate è tanti ringrazii à tutti è ch’elli càmpinu torna 100 anni in cantu è in mùsica !