Umagiu à l’amicu Petru Guelfucci troppu prestu sparitu, ch’hà accumpagnatu 50 anni di vita è di lotta di u pòpulu corsu, eccu sta puesìa chè no vulemu dedicà dinù à tutti quelli in cerca di libertà in stu mondu. Pensemu dinù à i prigiuneri pulìtichi è e so famiglie chì bràmanu sta libertà è fèrmanu in una strada senza sboccu per vìa di e chjusure di u Statu. Ch’elli tròvinu forza è curagiu. Ùn ci scurdemu di elli.
Nantu à li mio quaterni
di scularu scrianzatu
nantu à la conca bianca
di tutti i nostri inguerni
nantu à lu fogliu cutratu
di a neve di ferraghju
sò eo chì scriveraghju
« a puesia hè libertà »
Nantu à l’arestu è u disertu
di a piaghja è di l’alpale
nantu à la mio tarra stanca
di tante strade à l’apertu
nantu à l’altu casale
rittu à mezu petricaghju
sò eo chì scriveraghju
« a puesia hè libertà »
Nantu à le case sole
d’un paese maraviglia
nant’à la rossa calanca
innuratu da u sole
nant’à tè senza sumiglia
a mio isula di maghju
sò eo chì scriveraghju
« a puesia hè libertà ». •