Storia

Aleria, locu di memoria

Edmondi Simeoni avia creatu l’associu Aleria 75 cù uni pochi di cumpagni di lotta… è inauguratu una stela di u ricordu in u 2014 da chì e nove generazioni ùn si scurdèssinu di ssu locu di storia.

Ssu 22 d’aostu 2021, pè u 46u anniversariu di ss’evenimentu ch’anu insanguinata a Corsica, a so vèduva, Lucia Simeoni è l’associu Aleria 75, in presenza di u so figliolu oghje presidente di u Cunsigliu Esecutivu, Gilles Simeoni, più d’un centu di personi si sò datu appuntamentu.

Hè statu annunziatu u prugettu per marcà di più è di manera landane ssu locu di storia, cù a custruzzione d’un parcorsu memuriale, in cullaburazione cù l’Università di Corsica.

Un parcorsu per arricògliesi è vultà 46 anni fà, cù soni, lumi, cuntendu è ramentendu di manera rispettosa cìo chì s’hè passatu, fà capisce u sìntimu sparsu tandu d’abandonnu, a paura è l’angoscia di vede u pòpulu sparisce. Aleria hè u sìmbulu d’una presa di cuscenza ch’hà fattu arrizzà omi è donne in tempi duri. Ci vulìa avè u curagiu d’affruntà i mezi di l’armata a più impurtante d’Auropa… Ci hè statu un drama tremendu, a lotta dopu hè stata aspra è longa.

50 anni per capisce è scrive a demucrazia tantu bramata.

Ssa presa di cuscenza hà fattu u so caminu è oghje bisognu ci hè di ramentà à i più giòvani d’oghje è di dumane, ciò ch’elli funu ssi mumenti.

Locu di memoria dunque, locu di ricogliu, locu di riflessione è di pruiezzione, per ramentassi u curagiu di ss’omi, è a necessità di travaglià sempre di più à sguassà a viulenza, à prutege ciò chì ci face nazione, à difende l’interessi di u pòpulu corsu, à tramandà e lezzioni d’Aleria, è sparghje e brame d’un avvene felice è in pace. « Avemu u bisognu chì a ghjuventù tramandi a memoria è sìanu artisgiani di sta nazione da custruisce. Ùn pudemu micca fiascà » hà dettu Gilles Simeoni.

Appuntamentu presu prestu prestu. •