Oamicu lettore, sàppia chì accade spessu à i crunisti di leghje un libru o di stà à sente un dischettu chì ci garba pocu. A lingua ùn hè quenta, u sughjettu di pocu intaressu, à le volte incuerente. Tandu, ci vole à truvà un’astru tema à l’affuria.
Hè ciò chì s’hè passatu questa a settimana.
Aghju persu u mo tempu cù un libru aneddòticu.
Or’dunque, aghju decisu di stà à sente questu u pruverbiu : « à fà a barba à u sumere si perde tempu è savone » è staraghju muta in tuttu per ciò chì tocca à stu rumanzu.
Dopu à qualchì riflessione, aghju sceltu di salutà una nàscita frà i libraccioli di gràtisi. Si tratta di « From paese », stampatu à 3000 esempiarii, è chì si pò truvà, frà astri, in numarosi magazini lisulani. Ci scrìvenu Élodie Sechi, Francescu Gras è Joseph Gras.
I sughjetti sò varii è u stilu agradèvule, spessu colmu à macagne.
Scuprarete, per un dettu, l’oroscopu nustrale, cù a volpe, u cignale, a malmignatta ecc. Ci sò ghjochi, sòsule (u fiadone, una bivenda vitaminata, è ancu una lessiva eculògica !), un almanaccu per sapè cosa è quandu piantà, è ci hè dinù una cronaca «moda ».
I ghjurnalisti t’anu ancu fattu interviste : Edgard Santelli ci parla di u so successu cù u so risturente di Lavatoghju, cunnisciutu da tutti i Balanini, ma ancu aldilà.
U gruppu Incantèsimu ci palesa a so nàscita è e so speranze. Si trova ancu un pìcculu albumu à fiuretti, una cronaca musicale, un bellu agenda chì prupone assai avenimenti ind’a Còrsica sana. Un artìculu ci prasenta art’è gustu chì s’hè tenutu in Aleria u 15 è 16 d’aprile. Per compie, pudemu mintuvà e duie pàgine dedicate à a storia d’Occi, stu paese abbandunatu chì si stendia sopr’à Lumiu. Hè detta, sta rivista lascia una bella piazza à a publicità. Ma, hè di règula pè un ghjurnale di gràtisi. Malgratu tuttu, a pudete misurà, i sughjetti sò ricchi è ùn tràttanu micca solu di a Balagna. Astru puntu d’intaressu, è cum’ella si pò induvinà d’appressu à u tìtulu, u corsu è l’inglese sò imbulighjati cù u francese. Leghjite dunque stu libracciolu, ci truvarate infurmazioni di prima trinca, scritti da u prufessore di lingua è cultura corse Francescu Gras.
Marina Chovin.