Vi prupongu sta settimana un libru chì m’hà cummossu in veru. A storia hè quella d’un omu, Etienne Bellefleur, chì t’hè un Acadianu, cioè un canadianu francòfonu. Ghjè dinù a storia d’una zitella, Sarah, figliola d’Etienne, ch’è no videremu ingrandà long’à u rumanzu. Trà i dui eroi, ci sò i cavalli : Carlisle, u predilettu d’Etienne, u tintu di Joujou chì t’hà da more in l’incendiu di a stalla, Safran, Darwin, Roselune è u so poltru Pégase, natu cù l’aiutu di Sarah, Rosewig…
A storia hè cumplessa : sò trè narrazione sfarente : un narratore esternu, Etienne è Sarah. Cusì avemu u puntu di vistu di i prutagunisti. Etienne hà un fratellu, Bruno, uspitalizatu in psicatria perchè hà messu u focu à a sigheria familiale. Ma questu u fratellu scrive sott’à u nome di Chacal testi chì u scopu hè di distruce à Etienne. Ma st’ùltimu riesce à fà astrazzione di e minacce di Bruno chì, à a pur’fine si tomba. Tandu sì chì Etienne si sente lìberu. Si pianta di beie è di scrive per fà l’ortu è custruisce una stalla pè i cavalli. Accant’à ellu, Sebastien, un amicu di sempre, feritu assai in l’incendiu di a sigheria. U locu ch’ellu campa Etienne si chjama « Le bois des songes », locu schjettu, lìberu da e vistighe funeste di Bruno.
Etienne hè divurziatu. T’hà avutu cù Lorraine una zitella, Sarah, è u babbu farà tuttu per participà à a so educazione. I primi tempi, ricusa Lorraine. Ma pocu à pocu si fàcenu cunfidenza è tuttu si passa bè. Ind’u mentre, sorte l’eroe cù Judith, è avarà un figliolu ch’ellu ùn cunniscerà ch’è dopu à un bellu pezzu, è ch’ùn avarai mai a stessa piazza chè Sarah.
Accade un ghjornu chì Sébastien frequenta una donna, Rachelle, chì l’ambizione hè tremenda. Si marìtanu è guasgi sùbitu riesce a moglie à cunvince u so maritu di dumandà i soldi chì, d’appress’à ella, Etienne li deve. Osinnò vole divurzià. Bruno sceglie Rachelle è, puru stacatu da ella, ùn sarà mai più l’amicu sinceru d’Etienne. Diventatu omu lìberu, Etienne parte in Còrsica induv’ellu trova à Laurence. Tutti l’anni si vèdenu in l’ìsula è, tandu, ùn ci hè più chè amore. Ma passa u tempu, Sarah, maiò ch’ella hè, aiuta à u babbu pè occupassi di i cavalli. Ampara in furia è ùn vole avè un’antra vita chè questa quì, malgratu à Etienne chì vulerebbe ch’ella si n’andessi in astrò da vede u mondu. Ma ùn ci hè manera. Un ghjornu, Etienne hà un accidente : stà paraplegicu. Dopu à qualchì stonda d’addisperu, decide di luttà è trova una manera di cuntinuà à cavalcà. Rivendica dinù u drittu di tene care à trè donne à tempu, chì sò trè manere di cuncepì l’amore. Eccu veradimente un bellu libru annant’à a cundizione di babbu, di e rilazione cù e donne amate, di l’amore pè i cavalli, di a lotta senza fine da truvà a felicità. Ci hè sempre qualcosa da fà per esse beatu, tocc’à noi à dacci di rimenu per truvalla.
Marina Chovin