Da Jérôme Fourquet

La nouvelle question corse. Nationalisme, clanisme, immigration

Eccu un ducumentu chì si prupone d’analizà a situazione di a Còrsica oghjinca : u perchè di a vittoria naziunalista à e municipale di Bastia è à e territuriale di dicembre 2015, u sistema clànicu è u razzìsimu. Letta a prima pàgina, capisce sùbitu u lettore chì u scopu di stu libru hè di mette à palesu a leia stretta trà u naziunalìsimu è u razzìsimu.

Prima infurmazione, ùn ci vole micca à parlà di vittoria naziunalista (ùn ci hè micca una crèscita di i voti di pettu à l’elezione di 2010, è sò belli chè luntani da i 50%), ma di disfatta d’una dritta è d’una manca disunite. Innò, u travagliu di i nostri eletti ùn conta per nulla. D’un latu, ci saria l’idee naziunaliste chì si spàrghjenu frà a sucetà corsa, di l’altru ci saria a crisa di u clanìsimu. Di fatti, Fourquet spieca chì sò i capizzoni à u putere in 2010 chì t’anu pigliatu misure forte (muzione pè a cuufficialità, aduzzione d’un statutu di residente, fiscalità, dumanda di l’annistia di i prighjuneri pulìtichi). Vinte l’elezzioni, i naziunalisti ùn averìanu dunque fattu nulla astru chè cuntinuà una pulìtica messa in ballu nanz’à elli !

D’altronde, a vittoria naziunalista sarebbe a cunsequenza di a crisa di u sistema clànicu, chì una manifestazione era u nùmaru impurtante di merri nant’à e liste : sè a lista di Giacobbi cuntava 19 merri annant’à 51 scritti, Fourquet insista : ind’è e liste naziunaliste dinù ci sò eletti. U clanìsimu sarebbe dunque, à sente à ellu, bellu luntanu chè mortu…

Si tratta dopu di u FN. Scrive Fourquet chì « plus Le Pen a obtenu de voix en 2013, plus les communes ont voté Simeoni en 2015» ! Ci spieca dopu chì l’affare dettu « des jardins de l’empereur » è quellu di Siscu sò manifestazione d’una viulenza endèmica sìmila à quella di u FN chì loda a resistanza corsa contr’à i maghrebini. À tal’puntu chì a Còrsica « affiche le taux d’actes antimusulmans rapporté à sa population le plus élevé de toutes les régions françaises » ! Ma ùn basta micca : cuntinueghja Fourquet cù a ghjuventù chì sarebbe naziunalista è razzista, for’di controllu di l’eletti trattati di cullaboratori, è chì li parerebbe d’esse e vìttime d’un razzìsimu anti-corsi. Allora hè detta : u razzìsimu non solu hè colpa nostra, ma ùn ci tocca micca s’ellu ùn hè ind’e nostre mente. Stu libru colmu à idee razziste contr’à i Corsi dipigne una sucetà vicina di a guerra civile cù, d’un latu i pòvari maghrebini è di l’astru i gattivi naziunalisti.

Allora, vultemu nant’à u tìtulu : La nouvelle question corse.

Lighjendu què, si pò aspettà risposte nove. Innò poi, non solu a questione ùn face chè minurà l’azzione di i naziunalisti ma cunclude chì, senza Giacobbi ùn averìanu mai pussutu tene e so prumesse. È a risposta hè sempre listessa : ci vole à mantene « l’état de droit » minaciatu da i naziunalisti. Eccu a màghjina di sti Parighjini chì tènenu a verità. Tocc’à noi à facci valè, mandendu à l’assemblea francese un o parechji deputati naziunalisti. È cusì sia !

Marina Chovin.

1 Trackback / Pingback

  1. La nouvelle question corse. Nationalisme, clanisme, immigration

Les commentaires sont fermés.