U parcu di Saleccia

Surtendu da Lìsula, fattu 4 chilòmetri, u parcu di Saleccia hè rinumatu, ch’ella sia pè e so piante o pè i so animali, tale e capre barbute o l’acelli cantarini. Ma ghjè dinù un locu chì t’offre à u pùblicu attività varie longu à l’annata, sopra tuttu pè i zitelli. Pudemu ammintà, per un dettu, a ricerca di l’ove di Pasqua piattate à mezu à una natura colm’à impiatte. D’estate, hè capita, u prugramma prupostu da u parcu di Saleccia s’arricchisce assai, è offre ogni settimana faccende sfarente.

Da u 17 à u 23 di lugliu 2017, per esempiu, i zitelli, à pàrtesi da trè anni, t’anu avutu a diccia di participà à dui attelli creativi : iniziazione à a musàica nant’à u vetru è rializazione di ghjuvelli cù pèrule è grigrì. D’altronde, anu pussutu andà à spassu cavalchendu i sumeri. Per ciò chì tocca à i maiò, ci hè una dimustrazione di a manera di distillà l’olii essenziali fatta da Virginie De Bruyn, distillatrice in Multifau. Hè da nutà chì l’inseme di ste attività sò aperte à tutti senza riservazione, è for’di a spassighjata cù i sumeri chì costa 5 u quartu d’ora, ùn vi custarà ma’chè u prezzu di a vìsita di u parcu.

Ma Saleccia sà dinù mette in valore u so situ naturale à l’occasione d’un festivale di cortumetraghji, chì u nome hè «Des courts en fête », cù a participazione di u Cinémotion di Purtivechju è di l’associu balaninu « Et pourtant ça tourne ». Ci tocca à mintuvà chì stu festivale si tene in Purtivechju è in Balagna, ma dinù in astri lochi di Còrsica, è ancu in cuntinente. Eccu dunque a prisentazione di stu festivale. Avà, ci vole à imaginà u particulare di u situ balaninu. In Purtivechju, i filmi sò palisati ind’una salla di sinemà. Quì, simu fora, à mezu à a natura è… à e zinzale, ma a ci francheremu bella chè bè. Ver’di ott’ore, dunque, lascemu a Territuriale 20 è seguitemu un chjassu senza catramu. Tandu, simu accolti da i benevulenti chì t’anu priparatu da chì beie è da chì manghjà. Aspittendu a notte bughja, sò chì chjachjàranu, sò chì rèndenu vìsita à e capre. Ma hè dinù l’occasione di vede à l’amichi ch’ùn càmpanu micca in l’ìsula d’inguernu. À 9 ore 15, si schjarisce u screnu è scupremu filmetti chì u tema cumunu ci pare d’esse « a zitellina ». Certi ci fàcenu ride, d’astri riflette, ma ci sò dinù unepochi chì ci cummòvenu. Più tardi, venerà u mumentu di vutà pè u filmettu preferitu : tal’è a manera di fà in l’Antichità, metteremu un còtulu negru ind’un vasettu.

È si compierà a serata cù a spartera di i nostri i sìntimi.

Cusì belli mumenti ! Ma ci hè sempre u perìculu di vede sparisce l’assocci chì e suvvenzioni ùn bàstanu micca. Allora, o amichi, ci tocca à participà à l’avenimenti pruposti ind’u vicinu, hè un affare di primura.

Marina Chovin.