Fà di l’alloghju un bè cumunu. Eccu a lotta ch’elli cundùcenu uni pochi di Berlinesi in Allemagna. U 6 d’aprile scorsu parechje grande cità di u paese, frà e quale a capitale Berlinu, anu manifestatu per dinunzià e spulzione lucative è l’aumentu di e pigioni. In u 2013, u merre di Berlinu avìa vendutu à un grande gruppu immubiliare privatu 65.000 alloghji. Dapoi, e càriche è l’affitti anu cresciutu à tempu à a scuntentezza di l’abitanti. Oghjeghjornu, si riflette à rivene in daretu, è si parla d’un referendum lucale nant’à a pussìbule « rimunicipalisazione » di l’alloghji oghje privatizati. Vonovia, Deutsche Wohnen sò grandi gruppi privati prupietàrii di decine di millaie d’alloghji è fàcenu cum’ella li pare, fendu soffre l’allemani i più precarii. Per luttà contr’à ssa speculazione, i manifestanti s’appòghjanu nant’à un artìculu di a Custituzione chì dice chì l’alloghju hè un « bè cumunu » cum’è l’acqua o e risorze naturale, è chì i gruppi privati ponu esse sprupiati da e municipalità sè a ghjente a dumàndanu. « Sè no tiremu tutti inseme, ci pudemu ghjùnghjeci, dice un abitante di Berlinu, ci tocca à mustrà chè no simu magiuriatarii è ch’elli ùn ponu fà ciò ch’elli vòlenu. A ghjente si ne more di sta speculazione ». Cusì cresce a zerga in Berlinu è in parechje altre cità d’Allemagna. Face chì l’omi pulìtichi s’impenserìscenu anch’elli di tuttu stu parapiglia è tene, è riflèttanu à l’urganisazione d’un referendum.
In Francia, hè tuttu u cuntrariu. Dapoi u primu di ghjennaghju di u 2018, a Lege di e Finanze hà messu in ballu unepoche di misure gattive per l’alloghju suciale. A calata di l’allucazione d’aiutu per l’alloghju, è l’aumentu di a TVA nant’à a custruzzione di l’alloghji suciali pruvuchèghjanu una messa in perìculu di l’urganìsimi pùblichi incaricati di riabilità o di custruisce l’alloghji suciali. Ste misure cundùcenu di fatti à una privatisazione di l’alloghju suciale in Francia. È ssa privatisazione hè un culpacciu pè a ghjente ch’abbisogna di ss’alloghji.
Sò torna i più pòveri e vìttime. Vale à dì, u pòpulu corsu pè a maiò parte. 80% di a pupulazione pò pratende à alloghji suciali in Corsica (contr’à 60% in Francia). 20% di a pupulazione hè in situazione di precarità. 6.400 famiglie anu fattu una dumanda d’alloghju suciale è menu di 500 alloghji suciali sò custruiti ogni annu in Corsica. Vale à dì quand’elli ci sò bisogni urgenti ! In Corsica dinù, ci volerebbe à cunsacrà l’alloghju cum’è un «bè cumunu». Avè un alloghju hè un bisognu principale à tempu chè pudè manghjà. U Statu francese ùn hè mai statu cusì pèssimu in quantu à a pulìtica suciale. Ci hè di chè à fassi penseru.
Fabiana Giovannini.