Pensu ch’ùn truvaremu à nimu per rigrette ssu 2020. È sè no pudìamu basgiacci, ci basgerìamu à più pudè per festighjà l’annu novu ! 2020 hè stata una gattiva annata, cusì gattiva ch’ella ci prumette ancu d’ingattivisce à 2021… A Covid19 hà adduluritu 140 famiglie corse à l’ora ch’eu scrivu, sperendu ch’ella ùn ci strappa torna vite care da quì à u 31. Millaie di Corsi sò stati cuntaminati, centinaie n’anu suffertu assai, parechji sò stati uspitalizati, à le volte addurmintati ind’u comà da pudè infrugnali l’ossigena in gola sin’à i pulmoni da ch’elli pòssinu rispirà è mantènesi vivi. Millaie torna sò tocchi da a crisa ecunòmica ch’hà da durà un pezzu. Certi sò arruinati o vicini da a ruina è ùn ghjùnghjenu à pensà à l’avvene. Ùn ci hè un cumerciante, un impresa, ch’ùn averà persu soldi. È sucialmente, trà pèrdita di travagliu è pèrdita di rivenuti, sò mondi à soffre di a situazione è à teme u lindumane. In listessu tempu, tutti i prublemi abituali, ben chè ingattiviti anch’elli, sò affucati, è ancu smenticati. I putenti sò mubilizati nant’à a crisa sanitaria è e so cunsequenze ecunòmiche è suciale, à le volte ancu pulìtiche. Mèttenu da cantu l’altri prublemi chì fèrmanu senza suluzione. A crisa eculògica è climàtica s’ingattivisce, e fureste primarie cuntinuèghjanu à brusgià, e sèguite di a catastrofa di Fukushima è e so acque impuzzichite di 62 radiunucleide frà e quale u tremendu stromtium, minàccianu. Sò oghje ammansate artificialmente ind’è pozzi ch’anu invechjati, è risichèghjanu di spaccassi. À tal’puntu ch’omu vulerìa sputali in mare. Ma l’oceanu pacìficu hè già troppu impuzzichitu da l’acque radiuattive chì si sò rivucate direttamente durante a catastrofa. Altri prublemi torna sò messi da cantu. E guerre, a fame, l’imigrazione è e so millaie di corcia ghjente nant’à e strade o in mare à fughje a misèria. Centinaie cuntinuèghjanu à more annudati. I malanni di u mondu sò impeghjuriti è l’omi sò incapaci à dalli di pettu, u soldu hè lege, cummàndanu l’interessi di i lobbies è di e multinaziunale di u prufittu.
In ssu fracassu, ci simu noi. Cù i nostri sogni, e nostre brame, cù à vuluntà d’esse, l’amore di i nostri, l’amore di u nostru paese, appruntemu à Natale è e feste di Capu d’Annu, da campà d’una manera bella strana quist’annu. L’auguri fèrmanu sèmplici, cum’è tutti l’anni, pace è salute per tutti. Brame d’avvene, di prugressu è di benestà, per tutt’ugnunu, pè a Corsica, pè a pianetta. Aspettendu di pudè dà di pettu à u 2021, prufittate quant’è vo pudete di e feste, aiutate i nostri agricultori è artisgiani, cumprendu prudutti nustrali chì sò cusì boni. Prufittate, ma firmendu prudente per voi è pè i vostri cari chì tutti averemu dinù ss’auguru tamantu di vede sparisce ssu Coronaviru è tutta ssa roccia ch’ellu ci hà purtatu.
À tutte è à tutti, cari amichi lettori, bon’Natale, bon Capu d’Annu, bon principiu è migliore fine ! •