Hè statu elettu à a presidenza di u più grande paese d’Amèrica latina, Jair Bolsonaro, d’ottobre 2018. L’omu hè anzianu militare, razistu, malallevatu, disprezzante ver di e donne, l’omossessuali, l’eculugisti, a ghjente di manca, l’artisiti, l’intellettuali, i pòveri, l’indigenii, i neri… Eppuru ! Hè statu elettu cù 55,13% di i voti in un paese di 210 millioni d’abitanti.
17 urganisazioni umanitarie si sò adunite per studià l’evuluzioni di i diritti di l’omu à u Brasiliu. U 30 di ghjennaghju scorsu, anu publicatu i so primi risultati. « I nostri partenarii brasiliani ci anu dumandatu di sparghje l’infurmazioni di ciò chì si passa ind’è elli », dìcenu l’ONG.
«Ci chjàmanu à u succorsu di pettu à e viulenze chì si pàssanu ind’è un’impunità è un assuffocu tutale ».
« S’urganizeghja a resistanza cù omi è donne chì lòttanu pè a difesa di i so diritti » dice Floriane Louvet di CCFD-TerreSolidaire. Per Internet Sans Frontières, un antra ONG frà sse 17 urganisazioni, « ci vole chì u mondu sàppia cìo ch’accade à u Brasiliu. Ssu paese si ne và di male in peghju nant’à u pianu demucraticu ».
A demucrazìa cala di manera tremenda dapoi u 2016.
E vìttime di e viulenze di a pulizza anu cresciutu di 47,3% è tocca pè u più a cummunità nera di i quartieri pupulari. I feminicidii anu cresciutu elli di 29,8%. E viulenze contr’à l’omossessuali anu cresciutu di 113 %.
6,9 millioni di famiglie sò senza tettu allora chì 6 millioni di casamenti sò vioti ! L’èttari di terre cuntestati anu cresciutu di 67 %. A fundazione Naziunale di l’Indianu è l’Istitutu naziunale di a culunisazione è di a riforma agraria sò stati sminuiti di manera tremenda.
U nùmaru d’indigenii assassinati hè cresciutu di 141%.
A sfurestazione hè cresciuta di 85%. I cunflitti per impadrunìscesi l’acqua si multiplichèghjanu. In 2019 torna, 3474 borse di stùdiu universitariu sò stati tolti, è u bugettu dedicatu à l’insignamentu superiore hè calatu di più d’un miliarda d’àuri. 320 funziunazii sò stati rinviati per vìa di a so upinione pulìtica. L’ONG sò perseguitate.
A stampa hè survegliata è sottu à cuntrollu di u Statu. « Bolsonaro hà presu misure chì minàccianu u drittu à a vita, à a salute, à a libertà, à a terra » dice a diretrice d’Amnesty Internaziunale à u Brasiliu. U drittu di purtà un arma hè statu simplificatu, u putere di a pulizza rinfurzatu cù u drittu di tumbà in missione. In deci mesi da ghjennaghju à ottobre 2019, 700 personi sò state tombe da pulizzeri, vale à dì 10 volte di più chì in 2018. Pulizzeri è militari cundannati per avè tumbatu ghjente sò stati graziati. I ministeri di l’ambiente è di a cultura sò stati suppressi. I dritti di l’indigenii sò attaccati da permette à l’imprese linaghjole di spugliali di e so terre è sacchighjà a furesta amazuniana. Fochi maiò per cacciali di sse terre sò incesi è u guvernu ùn face nunda per falli piantà o per punisce i rispunsèvuli.
Bolsonaro ùn crede micca à u riscaldimentu climaticu è si ride di l’allarme di l’eculugisti. U Brasiliu si ne và di mal’in peghju, è cù ellu, a pianetta sana hè sott’à a minaccia.
Fabiana Giovannini.