Accapu di a reddazzione

Derive

L’annata 2020 hè stata un annata di dùbbitu è di penseri. A crisa sanitaria di u Covid19 l’hà imbruttita di dolu, di suffrenza, di spicanza, d’inchietùdine. I raporti umani sò stati ciambuttati, dinù a cunfidenza in l’avvene. Basta à rompe l’equillìbrii fràcichi di a nostra ecunumìa per mette in perìculu a sucietà. In ssu parapiglia è tene, invece di mette in ballu «u mondu di dopu» ch’omu bramava à 8 ore di sera quandu tutt’ugnunu sciaccamanava di marzu e prufessioni medicale, quelli chì decìdenu per noi affòcanu a demucrazìa è u drittu di spressione. È menu u guvernu ghjunghje à ammaestrà sta crisa sanitaria, è più cerca à ingabbià u pòpulu è e so brame di ghjustizia è di libertà. Hè cusì a lege detta di «sicurità glubale» è u s’artìculu 24 chì prova à impedisce di dinunzià certe verità. In ssu cumbugliu induve soffre a ghjente, u Statu forse a pensa troppu occupata per riasgisce, è prova à incavistrala. È si runzica pocu à pocu uni pochi di i nostri dritti. Ancu assai, a sucietà cumencia à prutestà contr’à tutte ss’aggressioni. E derive di a pulizza per un dettu. Dopu à l’evacuazione cù battarchjate di migranti piazza di a Repùblica, e chjibbe di ghjurnalista, è l’aggressione vergugnosa di quattru pulizzeri contr’à un pruduttore, evenimenti ancu assai filmati, sò decine di millaie di personi chì sò fallati in carrughju in Francia stu sàbatu 28 di nuvembre scorsu. Sott’à a chjama di marchje pè a libertà (#marchedeslibertés) dìcenu di nò à u prugettu di lege «Sicurità glubale» è innò à e viulenze di i pulizzeri. «Ricusemu chì a Francia sìa u paese di e viulenze pulizzere è l’offese à a libertà d’infurmazione. Dimmu chì senza imàgine sparse da a sucietà civile, e viulenze pulizzere ùn saranu micca vindicate», spieca u Cullettivu #StopLoiSécuritéGlobale. U sistema hè malatu di e derive di a so pulizza è di a so ghjustizia. A Corsica a sà dapoi un pezzu, per soffre di a ripressione contr’à u naziunalìsimu, cù ghjente lampate in priggiò nant’à cartulari vioti, arrestazioni viulente a mane à bon’ora, parenti o zitelli scuzzulati, sbaglii di personi suvente, senza scusassi dopu, detenzione priventiva sistemàtica, prove fabricate (shè vista troppu suvente), dritti di a difesa disprezzati, prucessi vergugnosi, abusi da tutte e mamme, eccètera. A Francia scopre dapoi qualchi annu a viulenza di a so pulizza, peghju, scopre a tendenza à tace ssi malfatti di i pulizzeri. Allora, ancu s’elle ponu à le volte esse un perìculu pè una sucietà appaciata, u fattu di filmà è di sparghje l’imàgine di i malfatti pulizzeri nant’à e rete suciale è a stampa, hà cuntribuitu à apre l’ochji di l’upinione pùblica nant’à certe verità. Senza ssa libertà, anu da cresce e derive di a pulizza è lampà uni pochi di nucenti in priggiò… o, peghju, in i campu santi. A Francia dapoi parechji anni hà persu u grigliu di u «paese di i diritti di l’omu». •

Fabiana Giovannini.