1700 personi si sò scritte à e cummissioni di creazione di Femu a Corsica in tantu chì partitu di guvernu. U cungressu custitutivu hè previstu per l’8 d’ottobre pròssimu. Sàbatu scorsu, e quattru cummissioni èranu adunite è si sò sparsi i participanti in quattru sale da riflette à a messa in òpera di i fundimenti di u novu partitu, i so statuti è funziunamentu, a so cumunicazione, l’urganisazione stessa di u partitu è di u cungressu. À tempu, un travagliu hè fattu dinù ind’è e regioni, cuntribuzioni sò state dumandate, è parechje riunioni ci saranu da quì à l’8 d’ottobre. A mecànica hè lanciata, ùn puderà più rinculà. Dighjà l’attelli di stu sàbatu scorsu sò stati pruduttivi. Primu attellu, i fundimenti di u novu partitu. I so valori, universali è à tempu nustrali, i so principii è l’urientazioni chì fàcenu a so identità, l’obbiettivi, a demucrazia, a ricuniscenza di u pòpulu corsu, l’autunumia, l’autodeterminazione… A visione stratègica, è dinù u cuncettu d’apertura da definisce. Cumu àpresi da fà Nazione inseme ? Cumu fà per chì i valori di demucrazia, d’umanìsimu, d’èttica, di sulidarità… sìanu rispettate da rispunsèvuli cum’è da militenti ? In u secondu attellu, s’agisce di definisce u funziunamentu è e strutture ch’abbisogna u partitu pè assicurà a demucrazia interna ma dinù l’efficacità di u partitu è i so prugressi. Vale à dì, i so statuti, l’articulazione trà militenti è aderenti, à l’internu, è, à l’infora, e rilazioni cù a sucietà civile, i territorii è i Corsi à spalluzzera. Dinù l’articulazione trà « partitu di guvernu » è « partitu di militenti ».
Cumu urganizà à tempu a lea trà u guvernu è i militenti ? Cumu nutrisce di riflessioni l’eletti, è à tempu avè un sguardu crìticu da fà ch’elli ùn svìanu micca da i scopi è l’indiature ch’ellu s’hè datu u partitu ? Tamantu travagliu, nè ?! U terzu attellu riflette ellu nant’à e mudalità ghjurìdiche è tècniche da permette a creazione di Femu a Corsica. Vale à dì fà u puntu di e so risorze umane, di i cartulari di militenti, di e finanze è di a tesureria, di e trè cumpunente, u so materiale dinù, scagni è altri arnesi, cum’è Arritti per un dettu. Infine, u quartu attellu appronta u cungressu custitutivu d’ottobre. I mezi necessarii, a mubilisazione militente da mette in ballu, è a manera di sparghje l’unfurmazioni, un logò, un situ internet, eccèttera. Eccu ! S’appronta dunque u cungressu di Femu a Corsica è cù ellu una pàgina nova di u naziunalìsimu corsu. Appuntamentu hè datu à tutti dumènica l’8 d’ottobre in Corti.
Fabiana Giovannini.