Energìa !

U think tank Clean Energy Canada vene di pruduce un studiu nant’à l’evuluzione di l’alimentazione energètica di u mondu. Quelli chì pènsanu chì l’energìe fussile, puzzicose è periculose pè a salute di a ghjente è per l’ambiente anu sempre un avvene si sbàglianu è sbàglianu omu.

Da quì à pocu anu da sparisce l’energìe fussile. Ssu think tank s’appoghja nant’à l’invistiscimenti ind’è l’energìe rinuvelèvule di i trè paesi i più ingordi in energìa : a China, l’Ìndia è i Stati Uniti. Hè una bella nutizia ! Secondu à Clean Energy Canada u prezzu di i pannelli sulare anu da calà di 57% da quì à 8 anni è u prezzu di pruduzione di e centrale euliane dinù.

U prezzu di l’euliane in terra hà da calà di 26% è quellu di l’euliane in mare di 35% in u stessu tempu. Ssi trè paesi i più cunsummatori d’energìa fussile anu invistitu 245 milliardi d’auri in l’energìe rinuvelèvule in u 2016. A China, impuzzichita da a pulluzione, vole investisce torna 361 milliardi di dòllari da quì à 2020 in l’energìe pulite. L’ìndia hà custruitu a centrale sulare a più grande di u mondu è spera pudè tuccà 175GWh in energìa rinuvelèvule da quì à cinque anni. Secondu à Clean Energy Canada, 6,7 millioni di personi in u mondu travàglianu in l’energìe rinuvelèvule è in Amèrica, un impiecu nant’à 50 hè creatu ind’è l’indùstria di u sole. Sempre in Amèrica, a prufessione di tècnicu per intratene l’euliane cunnosce a più grande crèscita di u paese. Eccu un affare ch’hà da cuntrarià à Trump chì vole rilancià l’energie fussile ! «A transizione versu l’energìa pulita pare irreversìbile » dice a diretrice di Clean Energy Canada, « in i paesi sviluppati cum’è in i paesi emergenti, a pruduzzione d’elettricità di l’energìe rinuvelèvule piglia a suprana nant’à quella di l’energìe fussile, à un prezzu di più in più cuncurrenziale è di forte putenzialità ecunòmica ».

A dicìa dinù annu l’Agenzia Internaziunale di l’Energìe Rinuvelèvule (Irena) in u so raportu. U mondu hà pruduttu 153 GWh di più in u 2015 è vistu cresce di più di 8 % e stallazioni in energìe rinuvelèvule.

Una crèscita in grazia à a calata di i prezzi di u sulare è l’eulianu ma dinù l’idròlicu, a bioenergìa, a geutermìa… L’idròlicu hè u mezu u più capace di pudè ammansà l’energìa. 2016 hà cunfirmatu ste crèscite cù 160 GW di più secondu l’Irena.

Puru, l’energìe rinuvelèvule sò sempre pocu di pettu à l’energìe fussile è u nucleariu. 5% di a cunsumazione mundiale d’energìa è un quartu di a pruduzzione d’eletricità hè di risorza rinuvelèvule. Cù u so Scemà Regiunale di u Clìma, l’Aria è l’Energia (SRCAE) è a so prugrammazione pluriannuale di l’energìa (PPE), a Corsica hà di chè piglià anch’ella a so piazza in ss’evuluzioni mundiale. Aiò ch’hè ora ! _

Fabiana Giovannini.