Scola Corsa hà fattu a so prima rientrata u 6 di sittembre scorsu. In u fracassu di e gattive nutizie è di l’orrore di ssu mondu, hè cum’un bùffulu d’ossigena è d’allegria pè a nostra lingua. Di sicuru, ci volerà tempu da fabricà i corsufoni di dumane, ma basta à cumincià !
È sè n’aviamu fattu ssu passucciu 10 o 15 anni fà, sariamu forse à festighjà oghje i nostri primi basciglieri ! U fattu si stà chì, frà sse chjome bionde o brune ch’anu fattu i so primi passi in e scole materne di Biguglia o Bastia cù i so cartinelli, stringhjendu di a so manuccia a manu di u babbu o di a mamma… forse truveremu i nostri primi basciglieri da quì à 15 anni… Scola Corsa dopu à avè datu tantu à a nostra lingua dapoi l’annate 70, in grazia à ghjente cum’è Carlu Castellani, Ghjuvan’Battista Stromboni è parechji altri, s’hè rinfurzata per piglià un antra scumessa, quella di mette in ballu a filiera assuciativa d’insignamentu immersivu in lingua corsa ! Duie scole anu apertu quist’annu, a Scola Corsa di Biguglia, stallata in u gruppu sculare Simone Peretti, è a Scola Corsa di Bastia, stallata in a scola Charpak di Toga. D’altre seguiteranu di sicuru – è sò già numarose e dumande di e cumune – quandu averemu cunvintu u Statu di ziffrà cù Scola Corsa un cuntrattu d’insignamentu chì piglierà in contu e paghe di l’insignanti. Aspettendu, ci tocca à truvà soldi, da pudè offre u megliu à i nostri cinnini. Scola Corsa s’hè datu di rimenu, hà chjamatu à l’aiutu e cumune, l’imprese, u pòpulu, da sustènela cù doni per l’uni, sponsoring o mecenatu per l’altri. È u sustegnu pò ci hè ! È vi ringraziemu assai, in grazia à voi, sò già quattru impiecu è mezu in giru à i 25 primi ciucci, i so parenti, l’associi è i benevulenti chì travàglianu à u so benestà ! Ogni annu, per sse duie scole, ci volerà truvà 150.000 auri. È di più per apre d’altre scole. È più ci aiuterete, è più puderemu multiplicà i siti di Scola Corsa. Ùn ci hè pìcculu donu, centu pochi fàcenu l’assai, 10, 20, 50, 100 auri o di più, fate pè u megliu, fàtela sapè, dàteci u vostru sustegnu è truvatene d’altri, simu quì ind’un operata cullettiva, da spannà a nostra lingua è, cù ella, a nostra cultura. I nostri ciucci ampareranu tutte e materie in lingua corsa, ma dinù ampareranu l’esse corsu. Hè una fiertà immensa di pudè fà parte di ssa custruzzione, paziente ma cusì bella è à pro di l’avvene !
Scola Corsa sarà presente à a Fiera di Lìsula. Ferà dinù una bella festa d’ottobre in Biguglia. Hà apertu un situ internet : scolacorsa.corsica. Hà messu in ballu una chjama in crowdfunding nant’à HelloAsso : bit.ly/scolacorsa
Eppò ci pudete mandà un sceccu à a nostra Scàtula Pustale : BP 12, 20416 E Ville di Petrabugnu.
Cuntemu nant’à voi !
Evviva Scola Corsa ! Evviva a nostra lingua ! •