Accapu di a reddazzione

Ghjustizia

A morte di George Floyd, ssu neru americanu tombu da quatru pulizzeri chì l’avìanu tenutu u ghjinnochju nant’à u colu durante 8 minute, hè stata riqualificata in « assassiniu senza premeditazione ».

U pulizzeru Derek Chauvin chì l’hà tumbatu risicheghja sin’à 40 anni di prigiò è i so cumplici parechji anni dinù di prigiò. Viulenze è cùllera si sò scatinate in Amèrica dapoi a morte di Floyd, in un muvimentu ghjuntu mundiale, induve i manifestanti mùghjanu « no justice, no peace»… micca pace senza ghjustizia. Parechji pulizzeri americani anch’elli mùghjanu « ùn sò mica Derek Chauvin », inghjinuchjèndusi capu calatu di pettu à i manifestanti in segnu di rispettu per George Floyd.

«Derek Chauvin hà cummessu un attu criminale vergugnosu, ma ùn ci vole micca à accusacci tutti », dìcenu parechji frà elli. Eppuru, circa trè personi sò tumbati da pulizzeri ogni ghjornu in Amèrica. A metà omancu, dice un criminologu, sò tumbati senza ragioni è i neri sò maghjuritarii…

Ssu 13 di ghjugnu in Atlanta, Rayshard Brooks, babbu di quattru zitelli, hè statu tombu anch’ellu da pulizzeri chì u vulìanu arrestà. L’omu di 27 anni era addurmintatu in a so vittura perch’ellu avia betu. I pulizzeri u fàcenu suffià ind’è l’alcootest è vòlenu ammanichjalu, l’omu ùn si lascia fà è prova à fughje… u pulizzeru caccia a so pistola è li tira ind’u spinu. Rayshard Brooks hè u 15èsimu mortu da i pulizzeri in Atlanta dopu à una fucilata dapoi u principiu di l’annata. Ogni annu sò più d’un millaie à more cusì in Amèrica. Più d’un quartu sò neri alora ch’elli ùn raprisèntanu chì 12,7 % di a pupulazione americana. In Minneapolis, induve hè statu tombu George Floyd, u rivenutu medianu di i neri ùn ghjunghje à a metà di quellu di i bianchi (43,4%). U so livelllu di disuccupazione hè trè volte di più altu (10,3%) chì quellu di i bianchi (3,6%). È 25,4% di i neri sò prupietarii contr’à 75,3% di i bianchi. I neri anu 8,7% di più rìsichi d’esse arrestati per pìcculi deliti è raprisèntenu 60 % di e personi tumbate da a pulizza trà 2000 è 2018. Eppuru, nant’à 3000 lagnanze contr’à pulizzeri trà 2012 è 2009, solu una nant’à 10 hà sbuccatu nant’à una sanzione disciplinaria.

In Francia, i sìmbuli di e viulenze pulizzarie si chjamànu Adama Traoré o Cédric Chouviat. Adama, ssu ghjuvanottu di 24 anni mortu u ghjornu di u so anniversariu, in 2016. Adama, ch’ùn hà micca a so carta d’identità, fughje di pettu à i gendarmi ghjunti à arrestà u so fratellu.

Li còrrenu à pressu i pulizzeri. Placcatu in terra da trè pulizzeri appughjati nant’à ellu da tuttu u so pesu, 250 chilò. Ammanichjatu, hè messu in vittura. Si lagna d’ùn ghjunghje à rispirà è si svena. Ghjunti à a gendarmerìa, i gendarmi chjàmanu i succorsi. Quand’elli s’affàccanu i pumpieri, u tròvanu chjinatu nant’à a pansa, i mani ligati ind’u spinu, ùn rispira micca. Pròvanu à rianimalu. Ma Adama hè mortu. Dapoi, quattru anni di manifestazioni, millaie di ghjente in carrughju dinùnzianu e viulenze di a pulizza è dumàndanu ghjustizia è verità.

Fabiana Giovannini.