Accapu di a reddazzione

Ghjuventù sacrificata

«Simu una generazione sacrificata» dìcenu i ghjòvani studienti in Medicina di a Facultà di Corti (leghje e pàgine 6 à 8). Hè vera, ma micca solu pè i studienti in medicina… Parechji psicologhi a dìcenu, e cunsequenze di a crisa sanitaria nant’à a salute di a ghjuventù ùn sò solu leate à a cuntaminazione chì tocca piuttostu e personi anziane. L’aumentu di l’angoscie di i gjòvani pruvuchèghjanu dinù scunturbi chì ponu andà sin’à a depressione è u suicidiu.

A sulitùtine, u climà ansiogene sparsu ind’è i mèdia è a sucietà, u mancu di l’amichi, u mancu di surtite pèsanu, è aumèntanu i cumpurtamenti addittivi già forti pè a ghjuventù, alcolu, sigaretta, droga, medicamenti. Ssi ghjòvani quì ùn ponu gode di a so ghjuventù. Si sèntenu sacrificati cù un inghjustizia in più. Quelli chì sò alluntanati da i soi, sò chjosi trà i quattru muri di a so càmera di studiente da a mane à a sera di pettu à u so urdinatore, è quand’elli anu compiu i corsi, ùn ponu mancu andà fora per vìa di u coprifocu. Ghjè cum’è s’elli èranu in priggiò. Da ssa cundanna nàscenu situazione di perìculu. U situ alternativu reporterre.net face u puntu cù i ghjòvani di u muvimentu pè u climà. Ancu puru s’elli sò più armati per resiste à ssa crisa per vìa di u so ingaggiamentu pulìticu chì li dà forza è curagiu, sòffrenu anch’elli di ssa ruttura di lea è d’azzioni allora ch’elli cunnòscenu l’urgenze chì pèsanu nant’à a pianetta. E restrizzioni di libertà, a pèrdita di i pìcculi impichi chì l’aiutàvanu à migliurà e fin’di mesi, aumèntanu à tempu angoscie à precarità. A dice u 19 di ghjennaghju u sundagiu Odoxa-Backbone di France Bleue, France Info è Le Figaro, 80% di i 15 à 30 anni sòffrenu di ssa crisa è ùn ne vèdenu a fine. Parechji pàrlanu d’abandunnà i so studii. I ghjovani militenti pè u climà pròvanu à scumbatte listessu, ma sòffrenu di e ripressioni pulizzere. Sandy, 25 anni, militente d’Alternatiba si dice in zerga. «Hè leccu pè u +1,5°, andemu versu un mondu à +3°. Ogni ghjornu conta gaz à effettu di serra in più vale à dì morti in più, ma nimu ùn si ne face. Omu si scorda di l’urgenza.» À Sandy, li manca a lotta in carrughju, u militentìsimu da campà inseme. Listessu per Maria, 18 anni chì disciuleghja nant’à «ssu virus ch’impenserisce à tutti allora chì a strughjitura di u permafrost n’hà da liberà parechji altri». Pienghje tutte e sere, puru si sente «furtunata»«Certi studienti ùn ci ghjùnghjenu più, pènsanu à u suicidiu, trè si sò lampati pè a finestra… di vede certi chì sò male, mi face male ancu à mè» dice Maria. Youth for Climate manifestava quasi tutte e simane, oghje u muvimentu hè sfrinatu trà l’epidemìa è a lege nant’à a «Sécurité globale». Quand’elli pròvanu à fallà in carrughju i ghjòvani, sò vìttime di e batterchjate. «Ùn avemu più perspettive, ne visibilità» dice Noé, 21 anni. «A ghjuventù ùn hè micca ascultata. Cù i corsi à distanza, i studienti scavichjulèghjanu. U terrenu mi manca, a cultura mi manca, mi sentu inùtule». Lucìa, 21 anni, si lagna di l’amende è hà fattu parechje guardie custoghje. L’accolte sò interdette, ùn si pò più manifestà, «simu scuragiti, a situazione impeghjurisce, ma facciu a scelta di a disubbidienza». Sò quasi 60% à nutrisce un sìntimu di rivolta.

Tutta ssa ghjuventù privata di i so 20 anni, chì disgrazia! •

Fabiana Giovannini.