Avìa 35 anni. Si chjamava Hevrin Khalaf. Era militente curda in Sirìa è hè stata assassinata nant’à a strada di Kobané da milizie djiadiste à u serviziu oghje di l’armata turca, è anziani membri di e truppe di Bachar-El-Assad. U so assassìniu simbulizeghja l’orrore di ssa guerraccia ghjunta à i punti stremi da l’offensiva turca in a regione di u Rojava.
Prufittendu di a partenza di l’armata americana in Sirìa, a Turchìa hè entruta in Sirìa dapoi l’8 d’ottobre per stallà una zona di prutezzione di 32 chilòmetri à longu à e so fruntiere è impadrunìscesi dunque di e terre induv’elli càmpanu i Curdi. Ssi Curdi ch’anu aiutatu u mondu occidentale à batte Daesh in Sirìa. Èranu nant’à u terrenu per risparmià l’armate aurupee è americane. Ci sò stati centinaie di morti curdi, frà i quali assai donne cumbattente, per impedisce Daesh d’arradicassi in Sirìa. Oghje, abbandunnali à a so sorte hè un crìmine contr’à l’Umanità. È sò i più dèbbuli e vìttime di ss’offensiva, frà i quali i zitelli. Sò già più d’un centu di morti civili, è dui centu cumbattenti di e forze demucràtiche curde.
Hevrin era membre di a Direzzione di u Cunsigliu Demucràticu sirianu, è secretaria generale di u partitu demucràticu chjamatu l’Avvene di a Sirìa. Bramava l’avvicinamentu pacìficu trà Àrabi, Cristiani siriani, Turcmeni, Yézidis è Curdi da falli cumbatte inseme, à tempu contr’à Daesh è contr’à Bachar El-Assad. Hevrin era dinù una militente feminista, difendìa e donne di u Rojava è l’ugualità trà omi è donne. Hè stata viulentata, turturata è ammazzata cum’un cane. L’anu trovu cù una gamba truncata, carna à vivu, i bracci cuperti di lesioni, a so salma hè stata strascinata, u so visu acciacatu è minata parechje volte in capu, i so capelli sradicati cum’è s’omu l’avìa strascinata cù i capelli, palle in corpu è in pettu anu compiu ssu crìmine vergugnosu filmatu da parechje videò sparse nant’à e rete suciale di tutti i gruppi chì cumbàttenu contr’à i Curdi… A stampa turca à favore d’Erdogan hà salutatu ss’assassìniu ch’hà tumbatu dinù ottu altre civili in parechji lochi quellu ghjornu.
Hevrin mancherà assai à a diplumazìa in a regione. Era una donna di pace è di diàlogu.
U martoriu di ssa dunnona, u so curagiu, l’inghjustizia tamanta di a so gattiva sorte, ne face un sìmbulu di a demucrazìa affucata in ssa parte di u mondu.
«L’assassiniu di Hevrin Khalaf hè un crìmine di guerra » hà dettu a vicepresidente di u gruppu Verte/ALE à u parlamentu aurupeu. Ci vole ch’ella pianti ss’offensiva in u Rojava. Ci vole à aiutà i Curdi à truvà a libertà. Sò un elementu di stabilisazione indispensèvule in ssa parte di u mondu.
Fabiana Giovannini.