Accapu di a reddazzione

Làscita

Sò sempre incantata di e maraviglie ch’elle ci anu lacatu certe civilisazioni landane. Tamantu gèniu per fà sorge munumenti ch’anu varcatu i sèculi. Tamanta forza per custruisce catetrale maestose, piramide misteriose, immensi tempii antichi, stàntare pisendu tunnellate, puru senza trèmacu nè camiò, solu à a forza di i mùsculi è di i cerbelli umani…

Cosa serà a làscita di a nostra, a civilisazione? Annu, scientìfichi anu spluratu a fossa a più prufonda di l’oceanu Pacìficu, a cusì detta fossa di Mariannes à quasi 11 chilòmetri sott’à u mare… È cosa anu truvatu tandu? Un sacchettu di plàsticu è i so imballasgi di bombò! À 10.927 metri di prufundezza, eccu u tesoru ch’elli anu scupertu i spluratori di l’Abissi! Un studiu avìa già pruvatu ssa presenza di plàsticu ind’è l’abissi. 90 spèzie di gambarelli chjuchi chjuchi èranu stati chjappi ind’è a fossa di Mariannes è studiatu à u microscopu. Parechji pezzatelli di plàsticu sò stati trovi ind’è 72% di ssi gambarelli… In 2018, scientìfichi giappunesi avìanu anch’elli studiatu u fondu di l’oceanu à longu à 5.010 ciuttate, è truvatu 3.425 lozzi d’urìgine umana ind’è l’abissi. Plàsticu, mettallu, pezzi di materiale di pesca… 89% di sse mullizzerìe ghjunghjìanu di prudutti ghjittèvuli, à usanza ùnica. È ci avìanu truvatu anch’elli un saccu di plàsticu à 11.898 metri di prufundezza. Una volta in mare, u plàsticu s’ellu ùn hè micca ingullitu da l’animali marini, pò sopravive marighjendu millaie è millaie d’annate. À longu à ss’anni si scumpone in pezzucci periculosi pè a biodiversità. Di pettu à ssu scempiu, ùn ci hè altra sulluzione chè di pruvà di riduce, s’ellu ùn hè di piantà, a pruduzzione di plàsticu. È pè u più di ssu plàsticu à usanza ùnica.

Ma s’ellu ferma a pulluzione a più visìbile u plàsticu, d’altre pulluzioni crèscenu di manera tremenda minacciendu a salute di l’omi. Un raportu fattu da una rivista americana dimostra a pulluzione di e maree nere petruliere, ma dinù di i pesticidii è fertilizanti di l’agricultura intensiva, o di u mercuriu di l’estrazzione di l’oru o di a cumbustione di u carbone, o torna di i prudutti chìmichi industriali o farmaceutichi. Tutte ste pulluzioni vènenu di a terra, vale à dì di l’omu. Hè dunque nant’à a terra ch’ellu ci vole à mette in ballu misure di prevenzione, è nant’à l’omi è e so manere di campà ch’ellu ci tocca à agisce. Bisognu à unisce tutti i paesi di u mondu da ch’elli travàglinu inseme per curà è prutege u mare. Tutte ste mullizzerìe minàccianu a biodiversità marina, ma pruvuchèghjanu dinù infezzioni, intussicazione alimentàrie pè a salute di l’omi. «U battèriu di u colerà hè presente in u mare è sott’à l’effettu di u riscaldimentu climàticu è di i mullizzi ghjittati in mare, si multiplicheghja è tocca di più in più lochi» dìcenu certi scientìfichi. «Quand’ellu hè pulluatu u mare, nutrisce alghe chì prudùcenu tussine putente chì si ritròvanu ind’è l’òstrice, e mòscule, o i pesci. Pàrenu boni è ancu gustosi, ma quand’omu i manghja casca malatu è pò ancu more.»

L’omu strughje u so mondu. È si strughje incù ellu. •

Fabiana Giovannini.