Accapu di a reddazzione

Lingua cara

ARRITTI, purtendu u so nome cù passione, s’hè sempre impiecatu ind’è l’azzioni strutturante per l’emancipazione di u pòpulu corsu. 55 anni fà, era un mughju lampatu à i Corsi da ch’elli s’arrìzzinu è s’impègninu ind’è a lotta di u pòpulu corsu, per l’autunumìa ! Era dinù un affirmazione : simu arritti, simu un pòpulu è ci tocca à custruì u nostru avvene. Avemu partecipatu cusì à tutte e lotte di ssu pòpulu è, aldilà, tutte e lotte per l’ambiente, per l’ecunumìe identitarie, pè e lingue è e culture. M’arricordu 30 anni fà quand’hè stata lanciata a dimarchja Femu Quì à a Ghjurnata d’Arritti di u 1990 in A Ghisunaccia. Vulìamu rompe cù e scunfitte è l’addisperu in materia d’ecunumìa, pruvà ch’ellu si pudìa pensà l’ecunumìa di manera cullettiva è sulidaria.

30 anni dopu a sucetà di capitale rìsicu hà creatu è cunservatu più di 1000 impiechi è sopratuttu hà fattu prova chì malgratu a crisa ecunòmica ci era sta brama di pudè fà inseme. Oghje, Femu Quì s’hè stallatu in u paisagiu ecunòmicu è suciale di a Corsica è mondu sperienze di sustegnu finanziariu à l’imprese corse sò ghjunte à cumpletà a so azzione. Hà indidatu a strada di a cunfidenza. Arritti hè fieru d’avè partecipatu à sta rièscita !

Oghje un antra scumessa di stessa andatura s’impone, d’un affettu ancu più forte per vìa ch’ellu s’agisce quì di ciò chì face è affiura l’ànima corsa, a nostra identità prufonda, a lea trà e generazioni : a nostra lingua ! Tutt’ugnunu a sà, a lingua corsa hè detta frà e lingue e più in perìculu di disparizione da l’Unesco chì priserva i patrimonii naturali ma dinù umani di a pianetta. Una lingua hè un sprichju di stòria di l’Umanità, un pezzu d’universale, un tisoru da priserve è tramandà. Morte a lingua, mortu u pòpulu dice l’adasgiu pupulare. Mondu associ, azzioni, manifestazioni sò state cundutte dapoi 60 anni è u naziunalìsimu mudernu. Ci simu impiecati pè u più in u duminiu pùblicu in cerca d’un statutu d’ufficialità solu da pudè assicurà l’avvene. Forse ùn avemu micca misuratu abbastanza a vuluntà distrutrice di u Statu francese, u so disprezzu di l’altre stòrie, l’altre lingue, l’altre culture. A so brama d’uniformisazione in giru à u giacubinìsimu chì ci face una guerra sutturna, paziente è d’un efficacità tremenda. Quand’elli ne pigliàvanu cuscenza i nostri amichi baschi, brittoni, catalani, occittani, è più tardi alsaziani in Cuntinente, noi quì ci fecìamu sente in u cumbattu stituziunale. Ma ssa lotta hè longa è dura. Per quessa ch’iniziative autònome sò dinù indispensèvule. Cusì Femu Quì per l’ecunumìa. È cusì l’insignamentu assuciative immersivu pè a lingua corsa. Ci tocca oghje à capisce ssu bisognu di fà da per noi per ùn sparisce è per cuntinuà di furmà i corsufoni ch’ella ùn vole più furmà l’Educazione naziunale. Hè una vera scumessa di long’andà. L’inghjocu hè maiò. Assicurà a tramandera di u nostru esse prufondu à traversu a nostra lingua. Fabrichendu corsufoni ind’è scole immersive fabricheremu dinù zitelli attaccati à a so cultura, a so stòria, i sapèfà isulani. Più chè un bagnu linguìsticu, invitemu quì à un bagnu nustrale, hè una necessità è u mèttodu hà fattu prova di a so rièscita. L’insignamentu immersivu hè un appoghju indispensèvule à e lotte pè u nostru avvene, di natura à rilancià a lotta pè a cuufficialità di a nostra lingua dumane. Aiutèmuci. •

Fabiana Giovannini.