Sò quatòrdeci i ciucci nati senza una manu o senza un bracciu in pocu tempu è in lochi cuncentrati. Affari sìmule ùn accàdenu micca di manera naturale. A prevalenza hè troppu impurtante.
A mediana naziunale hè di 1,7 casu per 10.000 nàscita. Ci hè di chè à inchietassi in vera.
I dipartimenti cuncernati sò l’Ain, induve sette ciucci sò nati cusì trà 2009 è 2014 in u paese di Druillat, a Loire-Atlantique, induve sò trè i ciucci nati mozzi in 2007 è 2008 in u paese di Mouzeil, è quatru altri ciucci in una sola cumuna dinù di u Morbihan trà 2011 è 2013 (Guidel). L’affare hè stata revelata da un epidemiologista di u registru di malfurmazione Rhône-Alpes (Remera). Hè stata spartuta nant’à e rete suciale senza ch’ellu ci fussi una reazzione salutaria di l’autorità francese. Bellu u cuntrariu, a circatore hè stata minacciata di perde u s’impiecu cù cinque altre personi chì travàglianu cù ella. Di chè rinvivisce a pulèmica. A settimana scorsa parechje persunalità di sfarente sensibilità pulìtiche, anu datu inseme una cunferenza di stampa per dinunzià u fattu, dumandà inchieste pùbliche è registri di malfurmazioni in ogni regione di Francia. Oghjeghjornu, solu 19% di u territoriu sò cuperti da un registru. Delphine Batho, Pierre Darheville, Corinne Lepage, Michèle Rivasi, è parechji scientìfichi cù elli si sò dati appuntamentu à u parlamentu aurupeu per indità u pocu sèriu di l’autorità francese. « Sò prufundamente cummossa da l’attitùdine di l’autorità sanitarie. Salute Pùblica Francia dice ch’ùn cerca micca e càuse di sse malfurmazione.
A ministra di a salute Agnès Buzyn ùn si sprima micca. Cosa’omu vole piattà ? Hè un stumachjeghju» hà dettu l’anziana ministra Delphine Batho. « L’attitùtine di Salute Pùblica Francia hè inaccettèvule. Perch’è ùn si cerca micca a verità ?
Si mette a pòlvera sott’à u tappettu. Ci vole à mòvesi di manera larga da ubligà u Statu à mette in piazza registri di e malfurmazioni in tutte e regioni » dice l’anziana ministra anch’ella Corinne Lepage. «Dumandu chì Salute Pùblica Francia ricunnosci u so sbagliu. Ùn si pò capisce ch’ellu ùn piglii micca in contu sette casi di zitelli nati malfurmati ind’è l’Ain, in un circondu ridottu di 17 chilòmetri.
Ci vole à circanne e càuse. Seranu pesticidii ? Prudutti chìmichi ? Nucleariu? O una altra ragione ?
Ci pare chì u Statu feci tutti per affucà l’affare » dice a deputata aurupea Michèle Rivasi. Nè alcool, nè sigarette, nè medicamenti, Celine, ella, ùn capisce micca perch’è u so ciucciu di 4 anni hè natu senza bracciu. «Ùn manghjàvamu chè prudutti naturali » dice a mamma. Quandu Sacha li dumanda « o mà perch’è ch’ùn aghju micca un antra manu cum’è l’altri ? », a mamma li risponde « perch’è ùn hè riesciuta à puntà quand’è tu eri in colpu à mamma ».
«N’importa chè ! » mughja u zitellu. Sò quatòrdeci i zitelli à vulè risposte.
Fabiana Giovannini.