Mikhaïl Gorbatchev, ch’hè statu unu di i più putenti omi di a pianetta à l’èpica induv’ellu era à capu di l’Unione Suviètica, s’inchieta è dinunzia a corsa à l’armi di i capizzoni mundiali. Li face a paura a militarisazione di u mondu. «A situazione hè periculosa» dice l’anzianu presidente rùssiu. «Gorby», cum’è u chjàmanu i Rùssii, avìa surpresu e nazioni aurupee quand’ellu avìa invitatu à l’èpica i Stati Uniti à piantà a corsa à l’armamenti nuclearii. Tandu, e rilazioni trà e duie putenze mundiale s’èranu appaciate. Ma oghje s’ingattivìscenu è Gorbatchev s’imprimurisce. Cundanna e spese maiò pè e difese di numarosi Stati in u mondu, allora ch’elli ùn ghjùnghjenu micca à « finanzà u mìnimu suciale pè u so pòpulu». Dice chì « ci si trova facilmente soldi per sviluppà l’arme e più suffisticate è dannighjèvule cum’è l’arme di distruzzione massive ; è si custruisce bastimenti sottumarini carchi à missili allora ch’unu solu basta à distruce a metà di u cuntinente…»
«Oghje, dice torna l’anzianu presidente suvièticu, a minaccia nuclearia pare torna reale, e rilazioni trà e grande putenze si spèzzanu ». L’omu di 85 anni, forte di a so sperienza, lampa una chjama : « invece di circà à impedisce a guerra, caccià l’arme, l’arsenali, appacià è circà à sèntesi, u mondu corre appressu à a militarisazione », allora ch’ellu ci volerebbe à « luttà contr’à u terrurìsimu, a puvertà, è à favore di l’ambiente ». «Ci tocca à agisce » dice torna Gorby. « Pare chì u mondu s’appronti à a guerra… di più in più suldati, carri è currazzati sò traspurtati in Auropa »… parla quì di i 4000 suldati americani sbarcati in Allemagna di ghjennaghju scorsu per avvicinassi di i Paesi Balti. «U mondu viaghja à capu in ghjò » dice torna Gorbatchev « simu ind’una crèscita murtifera »…
Hè vera. A Francia accatasteghja 300 missili nuclearii. Sette altri paesi in u mondu (ufficialmente, forse, ci n’hè di più) ammaèstranu l’arma nuclearia…. A Russìa (8000!) è i Stati Uniti (7300) anu elli soli 93% di l’arme nuclearie mundiale. Da chì fà saltà a pianetta centu volte è più ! L’altri paesi sò a Francia dunque (300), a China (250), l’Inghilterra (225), u Pakistan (110), l’Ìndia (100), Israele (80) è a Corea di u Nordu (10). È sò i listessi paesi à gòdesi di u marcatu mundiale di l’arme. I stati Uniti sò i più grossi spurtatori d’arme in u mondu ch’elli vèndenu à 170 paesi… dittatture da tutte e mamme… Dopu vene a Russìa. Vende 10 % di e so arme à a Sirìa. A Francia face parte di i cinque più grossi spurtatori. Ùn li disturba mancu a pena anch’ella di vende à paesi ch’ùn rispèttenu micca i diritti umani. Dinù u Reame Unitu (o ci volerebbe à dì l’Inghilterra, dopu à u Brexit ??). A China ripresenta 5% di u cumerciu mundiale di l’arme clàssiche. Vende à i paesi sottusvilupati in Àfrica o in u Mèdiu Oriente… Hè un business tamantu. Cumu vulete ch’elle piàntinu e guerre ? Hà a raggiò Gorby… u mondu viaghja à capu in ghjò !
Fabiana Giovannini.