L’8 di dicembre hè Festa di a Nazione corsa ! U ghjornu di L’Immacculata Cuncezzione, Regina di a Corsica, hè statu sceltu ghjornu per unurà a so santa prutezzione nant’à a nostra ìsula. Hè in u diciottèsimu sèculu chì i patriotti corsi in lotta contr’à Ghjènuva s’addunìscenu in Cunsulta à u Cunventu d’Orezza, pò in Corti, in u 1735. I sturiani si dispùtanu di sapè sè e so decisioni tandu sò state pigliate in Orezza o in Corti. Ma pocu imprema. Sicuramente ch’elle èranu i dui lochi appuntamenti regulari di i naziunali. Èranu tempi di cumbugliu è di rinascimentu, s’addunìanu in i cunventi per dibatte di u s’avvene è di e lege à dassi per custruisce a Nazione. A Santa Vèrgine Maria era di fattu una prutezzione. Puru a scelta di falla Regina di a Corsica ùn hè stata solu una scelta religiosa. Ma dinù una scelta pulìtica per vìa chì i Corsi ricircàvanu aiutu à l’infora, è pè u più di u Papa, ch’era putente puliticamente è nant’à un pianu militare. Ci èranu assai Franciscani ind’è l’ìsula per appughjà ssa dumanda. Hè cusì chì l’8 di dicembre diventa u ghjornu sceltu pè celebrà a Festa di a Nazione, è u Diu vi Salvi Regina, diventa l’innu naziunale corsu.
In u 1966, l’Azzione pè a Rinàscita di a Corsica, si dà un ghjurnale, Arritti ! È simbulicamente hè publicatu l’8 di dicembre u primu nùmaru ! Ind’è l’annate 80, ghjè l’Unione di u Pòpulu Corsu, muvimentu autunumistu fundatu da Màssimu è Edimondu Simeoni dopu à l’ARC, chì rilancia a Festa di a Nazione, sott’à l’azzione di militenti oghje smariti cum’è Elice Guerrini è Nunziu Grisoni. Eru ghjòvana militente tandu, è per mè era un tempu d’eccitazione allegra, scuprendu parte cusì fiere di a nostra stòria, da fà rinasce cum’è in quelli tempi ! Fochi in tutti i paesi, canti, sunate di campane, era in bullore a Corsica sana à l’èpica di Pasquale Paoli. Parte nostra, cunferenze di stampa, stampini, messe nustrale, serate culturale sò state urganizate per riacquistà ssu passatu. Ma e divisioni di i naziunalisti, è a guerra frà elli dopu, sò stati un culpacciu à e nostre prove di rinvivisce sse stonde di gioia è di fratellanza.
In fine di l’annate 90, ghjòvani naziunalisti pròvanu à rinvivisce anch’elli ssa festa. U sindicatu studientinu Ghjuventù Paolina riesce à rende festivu ssu ghjornu da l’amministrazione universitaria chì decide a chjusura di l’Università. Dapoi tandu e manifestazioni ùn anu mancatu da ch’ella sìa fatta listessa à livellu di a Corsica sana. I ghjòvani, studienti o liceani, dumàndanu à ciò ch’ellu sìa ghjornu festivu ogni annu l’8 di dicembre. Appòghjanu i muvimenti naziunalisti. Ogni annu fiurìscenu parechje iniziative per festighjà ssu ghjornu. Messe in lingua corsa, serate culturale, fochi, fucilate di gioia, pulendate, sfilarata di bandere… È, ogni annu, a dumanda ch’ellu sìa festivu ssu ghjornu hè rinuvellata. L’Educazione Naziunale s’hè risolta à lacà l’iniziativa à i studienti da ch’elli ùn si mèttinu micca in greva quellu ghjornu. È, in u 2016, pè a prima volta, a Cullettività Territutiale di Corsica dà a so ghjurnata à l’agenti di a regione ! In parechji cumune oghje ssu ghjornu hè festighjatu di manera ufficiale. Infine chì, di rivendicazione naziunalista, l’8 di dicembre oghje hè diventata una cumemurazione più spartuta. Ma ferma torna un bellu caminu da ch’ellu rivene ssu ghjornu di festa ch’ellu era in u diciottèsimu. •