Accapu di a reddazzione

Primarie

Qualsìasi e nostre upinioni pulìtiche, ci tocca à ricunnosce u spìritu d’apertura di Europe Écologie les Verts chì hà u curagiu d’urganizà primarie per l’elezzione presidenziale. Serà da u 16 à u 29 di sittembre pròssimu. Una prova di demucrazìa participativa da salutà. Apertura cù l’altri partiti detti eculugisti (Génération.s, le Mouvement des progressistes, Génération écologie et l’Alliance écologiste indépendante) ; apertura à candidati ch’ùn sò micca EELV ; apertura à l’elettori fora di EELV, chì, per vutà, basta à avè 16 anni, zifrà una Càrtula di i valori eculugisti è dà una participazione di solu 2 auri. Apertura à i ghjòvani dunque. Infine apertura à e donne, è omu cunnosce quant’elli sò primurosi i Verdi nant’à a piazza di a donna à u senu di u so partitu, sin’à a parità tutale in e prese di parulle in i dibàttiti interni o pùblichi ! Hè quantunque un rìsicu pulìticu di dà a parulla à u pòpulu per sceglie a persona chì raprisenterà l’eculugìa à e presidenziale. Ma u rìsicu u più grande ghjè l’Umanità chì u corre cù catastrofe sempre più gattive è viulente. Per quessa, aghju datu 2 auri è sceltu di participà à sse primarie per vìa di tutte l’urgenze di a pianetta, urgenza climàtica, urgenza sanitaria, urgenza suciale, urgenza demucràtica… A ghjente hè delusa di a pulìtica, i citatini ùn partecipèghjanu più à l’elezzioni, ma mi pare chì ssu rinunciamentu hè a più gattiva di e suluzioni. Mi pare chì e priurità di a pianetta dèvenu piglià u passu nant’à tutte e desillusioni è tutte l’altre cunsiderazioni perch’è si parla oghje, senza esagerazione, di a sopravivenza di a vita nant’à ssa terra.

A pèrdita di biodiversità hè tremenda è porta à d’altre pèrdite ind’è l’urganisazione di ssa vita. Smarìscenu l’ape è i pullunisatori, mondu spezie d’insetti in generale, chì pruvuchèghjanu a sparizione di l’acelli digià minacciati da parechje altre agressioni umane. Un terzu di l’acelli di e campagne anu sparitu. E pupulazioni d’acelli, ma dinù di pesci, di mammiferi, d’anfibiani, di rettili anu rinculatu di 68% dapoi l’anni 70 ! E catastrofe climàtiche si multiplichèghjanu, fendu morti è disguasti tremendi. Sucialmente sò i più pòveri chì pàcanu pè i più ricchi chì sò i principali rispunsèvuli di ssi disguasti ! Per quessa, mi pare chì, à una presidenziale, ci vole di manera capitale chì a parulla eculugista sìa presente à un altu livellu. Vuteraghju dunque à ssa primaria è frà i cinque candidati presenti mi pare torna chì Yannick Jadot hè u solu à pudè fà sente ssa voce abbastanza forte da pudè impònesi. S’ellu ci hè un interessu à ss’elezzione, in ssu secondu millenariu cunfruntatu à e minaccie ambientale, hè d’impone l’eculugìa. Risponde à a dumanda chì pulìtica pè a pianetta, vale à dumandassi chì pulìtica pè u nostru cutidianu è chì pulìtica per l’avvene di i nostri zitelli ?

Allora, facciu una chjama. Sè v’avete primura di u nostru ambiente, pè a Corsica, è pè a pianetta, scrivìtevi à a primaria eculugista (nanzu à u 12 di sittembre chì ghjè l’ùltima limita pè e scrizzioni) è vutate à Yannick Jadot da chì l’eculugìa sìa un messagiu forte di ssa campagna presidenziale è possi avè qualchi scenza di truvassi à u secondu giru.

Eccu u leame per scrìvevi : https://primaire.neovote.com

Fabiana Giovannini.