59 donne sò state tombe dapoi u principiu di l’annu.
Per piacè, rispunsèvuli pulìtichi, ùn salutate più a donna l’8 di marzu sè vo ùn site capace di fà una priurità di a lotta contr’à e viulenze chì li sò fatte. È per luttà, basta à ùn cunsiderale cum’è una fatalità. Basta à ùn mantene ind’è a sulitùdine è l’addisperu e donne sott’à a duminazione d’un omu, basta à incuragile, à accumpagnale, à difèndele. Basta à imprigiunà l’omi viulenti è caccià i so dritti à i ricidivisti. Basta à dirizzà un muru di sicurezza da chì sse donne è i so figlioli ùn sìanu più in perìculu à campà in u terrore di l’agressione. E donne assassinate st’ùltimi anni avìanu chjamatu aiutu, postu lagnanze, elle, i soi, i so vicini. Ùn sò micca state intese. Dumanda a psichiatra, Muriel Salmona, presidente di l’associu « Mémoire traumatique et Victimologie », « perchè e donne sequestrate, perseguitate, viulentate, minacciate di morte da u so cunghjuntu o anzianu cumpagnu di vita, sò cusì pocu prutette ? Fùghjenu, alèrtanu, pòrghjenu lagnanza parechje volte è ùn sò micca intese. »
Julie Douib avìa postu lagnanza parechje volte, u so babbu dinù. Dicìa a corciarella « mi crederanu quandu saraghju morta »… hè stata tomba da duie pistulettate è u so anzianu cumpagnu micca abbastanza survegliatu malgratu e so minaccie. Chahinez Daoud hè stata ferita anch’ella da una pistulettata è brusgiata viva malgratu e so lagnanze è quelle di i so vicini. Malgratu l’ordunanze d’ùn avvicinassi, u so cumpagnu ricappiatu, ùn hè micca statu abbastanza survegliatu. Stéphanie Di Vincenzo « si fecìa batte dapoi un pezzu. Tutti i vicini a sapìanu. » A pulizza dinù a sapìa, suvente chjamata da i vicini per via di u rimore di e lètiche di u coppiu. Hè stata lampata da a finestra, s’hè strascinata quantunque in carrughju ma richjappata hè stata tomba à cultulettate. Sandra Pla hè stata pugnulata anch’ella da parechje cultulettate. Avìa postu duie lagnanze, parechji vicini avìanu testimugnatu di u so terrore. « Ùn hè micca pussìbule, ci vole à more per truvà aiutu ? » accùsanu i soi… Doris Voinson hè stata lampata da l’ottèsimu pianu dopu à avè luttatu parechje minute cù u so anzianu cumpagnu. Digià cundannatu per viulenza cunghjucale era interdettu d’avvicinala. Ghjustizia è pulizza à currente di u drama putenziale, sò stati incapaci di prutègela. È a lista hè torna longa, è disgraziosamente s’allungherà… A sucietà hè custruita per l’omi, malgratu i prugressi di presa in contu di i diritti di e donne. Una spècia di cumpiacenza si face pè i criminali invece di prutege e so vìttime putenziale. L’educazione custruisce u maccìsimu chì face chì certi, incapaci di rispettu, si crèdenu prupietarii di e so cumpagne. I dritti fundimentali ùn ghjùnghjenu à parà ss’andature, trà u sessìsimu di a sucietà, e debbulezze di a so ghjustizia, e cumplicità in a so pulizza. Parechje alerte sò state puru date st’ùltimi anni. Fora di i feminicidii, i muvimenti cum’è #Iwas o #MeeToo… a dìcenu, ci hè una cultura di a forzatura in u mondu, chì parte da una prutezzione di i maschji da chjuchji chjuchi. À nome di l’educazione chì si deve fà per diventà omu, à nome di a sulidarità trà omi, o in a so famiglia, si ride di a donna, si rilativiza u mancu di rispettu chì li hè fattu, ancu e donne sò custruite à suppurtala… Ci hè dunque un travaglione à fà ind’è l’educazione. Aspettendu ci vole à mette mezi è cundanne per prutege e donne minacciate oghje. Sò parechje centinaie in Francia. Bisognu à accìnghjele di prutezzione. Braccialettu elettrònicu, cuntrollu è cunstrinte, vìsite psichiatriche imposte, per l’uni. Appartamenti securizati è accumpagnamentu suciale per l’altre. Ci tocca à creà un corpu speciale di prutezzione in a pulizza chì permette un attenzione permanente. Ci tocca à fà una priurità di ssa lotta contr’à e viulenze fatte à e donne è à i so cinini. •