Territuriale 2017

Racolta *

Hè ghjunta l’ora di a racolta. Mezu à i mughji, i canti, i basgi, e rise è l’amicizia scumpartuta dumènica sera… un omu, un pocu scartatu, silenziosu, ochji spampigliulenti, un pìcculu surisu nant’à e labbre, fighjava u spetàculu. À tempu staccatu da ssu cumbugliu, à tempu rallingrèndusi senza mustralla di a gioia ambiente… gudava ssa stonda di piacè. Cosa pensava tandu ? A suddisfazzione di u babbu ch’hà sappiutu trasmette stintu è sumerinu à u so figliolu. È quellu di u capifila à l’ora infine ghjunta di u bilanciu di tant’anni di cumbattu. Cume à uni pochi di militenti di e prim’ore, li sfilàvanu in mente di sicuru 50 anni d’imàgine, di pene, di brame… Cusì tante lotte, strazii, fiaschi. Offese, inghjulie, disprezzu. Da ssu 21 d’aostu di u 1975 induve tuttu avia ciambagliatu, forse li hè ghjuntu u filmu di a so vita, è quellu di u pòpulu ch’ellu hà sceltu di difende.

U sangue rivuccatu, l’annate di prigiò, i sacrifizii, e vite arrubate, eppò quelle di i fratelli chì si sò tumbati… eccu u prezzu pacatu à ssu 3 di dicembre 2017! Cusì tante inghjustizie, drami è martorii, à tempu intusiàsimu, fede è generosità ! Tamanta strada… Avvicinèndumi, i nostri sguardi si sò cruciati è l’ochji si sò parlati senza bisognu di scambià e parulle… Hè ghjunta l’ora di a racolta ! Per ellu, per tutti ssi militenti ch’anu datu cusì tantu, à longu à l’annu, per quelli ch’ùn ci sò più è chì forse ci accumpàgnanu avà da quassù, è per ssa ghjuventù oghje à mezu à noi, à campà e so prime gioie eletturale, à vulè scrive a so stòria anch’ella… ci era ssa dumènica sera un bellu sìmbulu di a vita d’un pòpulu. A lea trà generazioni, trà evenimenti, trà passatu è avvene.

Hè stata diffìciule tutte st’annate à strazià trà un capatoghju è l’altru, à soffre l’inghjustizie, à scumbatte contr’à e frode da tutte e mamme è a superbia d’omi senza vergogna chì sputàvanu nant’à a terra è a dignità di u nostru pòpulu.

E longhe serate di riunioni impuzzichite da u vapore di e sigarette è i disciulimi di l’uni è di l’altri, e cumbrìcule trà di noi, i culpacci è e tràppule, e notte d’affissere, ch’ellu piovi, ch’ellu nevi o ch’ellu venti, e campagne perse à l’avvanzu chì purtàvanu à i 2 o 3 percentuali… i ciarleghji in faccia, i soldi persi, u tempu arrubatu à e famiglie… e manifestazioni, e battarchjate, u dùbbitu, a fatica, a voglia di rinuncià, eppò ssa fede chì rinasce sempre, a sperenza, e spartere, l’ingaggiamentu mai sfiatatu, ssa fratellanza schieta di ghjente chì scumpàrtenu tuttu, gioia o dulore…

Ci vulia ch’ella sbocchi un ghjornu, nò, ssa strada !

O ghjente, u surisu d’Edimondu dumènica sera valìa u so pesu di piacè !

F. Giovannini