Riscaldimentu

Ogni volta ch’ella accade una catastrofa naturale, omu si mette à pensà à u climà è e cunsequenze di u so sregulamentu. Irma ch’hà scuzzulatu pocu tempu fà l’Antiglie hè ghjunta à ramentàcila. D’apressu à uni pochi di scientìfichi, e cunsequenze di ssu sregulamentu saranu bellu più peghju chì ciò ch’hè pensatu oghje da a cumunità mundiale. Puderebbe ancu diventà inabitèvule a pianetta da quì à a fin’di ssu sèculu. In certi lochi, l’omi cucerèbbenu in qualchi ora stendusine fora. Cità cum’è Miamì, o paesi cum’è u Bangladesh, puderèbbenu smarisce… È, dìcenu torna i scientìfichi, ùn si puderebbe frinà l’evuluzioni temute, ancu puru sè no piantemu oghje stessa a spluttazione di l’energìe fussile. Ghjè dì quant’avemu, forse, francatu i punti stremi.

E sicchine s’anu da arruinà a terra, è l’incendii a furesta amazuniana chì oghje cuntribuisce à 20 % di u nostru ossigene. L’aumentu di l’acidità di l’uceani si tumberà tutta a vita nentru, è u livellu di l’acqua cullerà affundendu u liturale da trasfurmà a geugrafìa di u mondu. Strughjèndusi, i ghjacci di l’Articu anu da liberà ind’è l’atmosferu une poche di microbii è malatìe inchjustrati dapoi millioni d’annate. Pesta bubonica, varghjole è influenze di tutte e mamme ! Parechji studii mòstranu chì puru piantendu avà e nostre emissioni di gaz à effettu di serra, ùn ghjunghjeremu à arrestà ssa mecànica di destruzzione. À què, ci vole à aghjustà a sparizione di une poche di spècie animale o vegetale. 177 specie di mammiferi sò stati studiati, mustrendu ch’elli anu persu 30 % di u so territoriu trà 1900 è u 2015 è 40 % frà elle sò sminuite assai è sò minacciate di sparizione.

St’ùltimi 40 anni, l’Umanità hà pruvucatu a fine di 50 % di l’animali terrestri. Vale à dì chì, sè no cuntinuemu cusì, da quì à 40 anni, ùn ci hè più nunda !

S’accadastèghjanu timpeste, inundazione è catastrofe da tutte e mamme… è i climatologhi dìcenu chì u cambiamentu climàticu hè rispunsèvule di ssi ciambuttamenti. Al Gore, l’anzianu vicepresidente di i Stati Uniti, sott’à Clinton, a dice anch’ellu ind’un novu documentariu catastrofa. Avìa fattu u filmu «una verità chì disturba » in 2006. Vene di esce avà « una sèguita chì disturba ». Dice Al Gore, « l’evenimenti climàtichi stremi sò cresciuti assai è divèntanu ancu di più destruttori da pertuttu ». Puru, ci hè quantunque mezu di sperà, dice torna Al Gore.

Perch’è l’omu hè capace di u megliu cum’è di u peghju. Millaie d’umani à traversu u mondu, intraprèndenu è fàcenu à favore di a pianetta, senza aspettà e decisioni di i Stati. E tecnulugìe pulite indìtanu e suluzioni. Solu a cuscenza generalizata pò cambià di versu. Hè ora !

 

Fabiana Giovannini.