2021 ùn hè stata l’annata di u ritornu per Alinu Ferrandi, Petru Alessandri è Ivanu Colonna. U s’avvicinamentu ùn hè ancu prugrammatu, malgratu u drittu, malgratu l’anni passati in prigiò, malgratu e dumande di e famiglie, malgratu quelle di l’eletti, di Corsica o d’altrò, malgratu e manifestazioni è e brame d’appaciamentu di i Corsi. U 17 di dicembre scorsu, una tribuna ziffrata da i deputati corsi à l’Assemblea naziunale è da i cinque presidenti di i gruppi d’uppusizione Gauche Démocrate et Républicaine (André Chassaigne), UDI (Jean Christophe Lagarde), Liberté et Territoires (Bertrand Pancher), France Insoumise (Mathilde Panot), Socialistes et apparentés (Valérie Rabault). Vale à dì una centinaia di deputati raprisentati ! Dui deputati di a maghjurità l’anu ziffrata dinù, François Pupponi è Bruno Questel, et dinù un deputatu LR, Antoine Savignat. Dumàndanu tutti ch’ellu sìa appiecatu u drittu è ch’elli sìanu avvicinati i trè omi. « Sta dumanda hè purtata cù forza da i Corsi è i so raprisententi quale sìa a so upinione pulìtica » dice a lèttera di i deputati, « Ci hè stata frà altru una risuluzione sulenna di l’Assemblea di Corsica, sustenuta da quelli chì sò stati presidenti di u Cunsigliu esecutivu o di l’Assemblea di Corsica dapoi u 1998, ch’elli sìanu di dritta, di manca, o naziunalisti, ma dinù da numarose cumune o intercummunalità di Corsica. Avemu intesu sta vuluntà d’equità è di ghjustizia. A spartimu è a femu nostra. Pensemu fundalmentamente chì nimu ùn puderà rimpruverà à u guvernu di diterminassi in stu sensu. Ghjè l’onore di a Repùblica d’appiecà u drittu. Ghjè u nostru duvere di parlementariu di riaffirmala è di dumandala. » Chjìbba ! S’aspettava una risposta da u guvernu nanzu à u 31 di dicembre. Puru, a cummissione chì decide di u statutu di DPS (ditenutu particularmente signalatu) ùn hè micca stata addunita ! Ùn s’era mai fatta sin’à avà. Ghjè dì quant’ellu hè imbestiatu u guvernu di pettu à i sustegni ottenuti da i trè prigiuneri corsi, puru, cuntinueghja quantunque à strumentalizà ssu statutu di DPS per a so vindetta di Statu. « Sè ùn sò micca un “prigiuneru pulìticu”, sè ùn sò micca un prigiuneru di drittu cumunu, cosa sò ? » dumandava pocu fà Alinu Ferrandi ind’una lèttera à u presidente di a Repùblica. Ùn si sà u perchè di u mantenimentu di statutu DPS per ss’omi. Ùn s’appieca nurmalamente ch’à ghjente viulente o incarcerati per fatti in lea cù u grande banditìsimu. A decisione di mantene o nò ssu statutu deve esse cuntrullata da a ghjustizia. Invece ùn si face pè i trè prigiuneri corsi. Bellu u cuntrariu, u primu ministru s’hè datu solu ssu drittu ! Face ch’ellu decide, solu, d’ùn appiecalu ! A Francia hè cundannata di manera regulare da e stituzioni aurupee per vìa di e cundizioni di detenzione in prigiò, dinù pè u statutu di DPS. Incarcerati dapoi più di 21 anni, Petru Alessandi è Alinu Ferrandi sò detti « cundiziunèvuli » dapoi u 2017 (vale à dì ch’elli ponu sorte di prigiò). Puru ùn sò mancu avvicinati ! Ivanu Colonna sera cundiziunèvule quist’annu. Puderà pratende ancu ellu à sorte di a prigiò. Ma per ellu, cum’è per l’altri, u statutu DPS l’impedisce d’esse incarceratu in Corsica ! Cumu sòrtesi di ss’attitùdine dittaturiale ? A Francia ùn hè micca un statu di drittu. •