Salme

39 migranti clandestini sò morti assuffucati, chjosi in un camiò vicinu à Londra. Ssa tragèdia tremenda ùn deve firmà cum’un attualità di più, una sèmplice è trista statìstica. Daretu à sse 39 salme, sò 39 vite piantate. 39 visi, 39 surisi, 39 sguardi umani, 39 stòrie, 39 cori chì tenìanu caru à i soi, figlioli o figliole, figliulini, babbi, po dassi o mamme, fratelli o surelle, amichi, partuti tutti à circà furtuna. 39 viacroci di suffrenze, 31 omi è 8 donne. Quantu tempu seranu stati chjosi cusì à sente vene a morte ? Chì saranu state e so ùltime pensate ? Chì saranu state e so ùltime parulle ? Cumu averanu passatu inseme sse stonde d’angoscie è chì si seranu dettu per resiste à l’assufocu è dassi curagiu ? Ch’averà pensatu l’ùltimu à more di pettu à i so cumpagni di disgrazia morti nanzu à ellu ? Averanu pregatu ? Averanu pientu ? Averanu cantichjatu, sussurendu in u bughju per luttà contr’à a paura ? Si saranu cuntatu a vita magnìfica ch’elli avìanu sunniatu ? Averanu parlatu inseme di u so paese, a so famiglia, i so prugetti, i so sonnii ? D’induve venìanu ? China ? Thaïlande ? Altrò? Di chì paese èranu i figlioli per francà centinaie di chilòmetri è finisce imprigiunati in un camiò in un cansatoghju d’astracu disertu, scumpientu di l’indiferenze di e nostre sucetà. «O Mà, o Bà, scusàtemi. U mo viaghju à u stranieru ùn hè micca riesciutu. Mamma, babbu, vi tengu cusì caru. Sò in traccia di more perch’è ùn ghjungu più à rispirà. O mà scùsami » hà scrittu da u so telefuninu, Pham, una ghjuvanotta di 25 anni, partuta da u Vietnam secondu à l’associu Human Rights Space.

Ch’averà fattu Pham, ch’averanu fattu ssi 39 curciarelli per merità una sorte cusì ingrata ? Di sicuru, si parlerà di ssi marcanti di morti, ch’apprufittanu di e pulìtiche di chjusura di l’Auropa per urganizà ssu tràfficu d’èssere umani è fassi soldi nant’à a so misèria. U sciuffore di u camiò serà ghjudicatu è punitu. I so cumplici dinù. Di sicuru, l’esistenza di sse filiere criminale purteranu à rinfurzà torna i cuntrolli di pulizza è di ghjustizia.

Vale à dì à fà chì i rìsichi saranu sempre più grandi… è u passagiu clandestinu sempre più caru.

Ma o ghjente, ùn sarebbe ora d’un esàmine di cuscenza cullettiva ? Punìmuci a quistione. Cum’hè chì ghjente si piàttanu è pìglianu rìsichi tamanti, sempliciamente da pudè campà ind’è noi ?

A stòria di l’Umanità hè stòria di migrazione, di mosse, di dispiazzamenti… I pòpuli si sò fatti cusì, da ssu mischiu di i passi è vene. Perch’è avenne a paura ?

Perch’è chì oghje una ghjuvanotta di 25 anni ci inchieta à u puntu di piglià misure è lege da impedìsceli d’entre in Auropa ?

 

Fabiana Giovannini.