Cù a crisa sanitaria, e pèrdite di u cumerciu di prussimità sò tremende. È cù ellu, sò parte impurtante di a nostra ecunumìa chì lèccanu. U cumerciu di prussimità hè a vita ind’è e nostre cità è i nostri paesi, sò e rilazioni umane, a cunvivialità, u scàmbiu. Sò un sboccu dinù per parte sane di a nostra ecunumìa, artisgiani, agricultori, editori… Sò mondu impiechi è sullevi di millaie di famiglie corse. Mà oghje, sò multinaziunale chì prufìttenu di i so capatoghji attuali, cum’è Amazon, u gigante di a vèndita in lìnea. Digià primu distributore di prudutti non alimentarii in Francia, u mostru americanu fundatu in u 1994 vede u so sciffru d’affare multiplicassi cù a crisa sanitaria di stu 2020, e chjuditure di i cumercii di prussimità è l’interdizzione di i grandi magazini di vende certi prudutti. In più, à l’avvicinanza di e feste di fin’d’annate, Amazon s’appronta à fà torna milliardi di benefizii ! Hè vera chì a sucetà impieca un millione di personi in u mondu, ma face sopratuttu l’affare di i multimilliardarii americani chì si ne gòdenu : a so richezza hè di 200 milliardi di dòllari, vale à dì u PIB di a Grècia ! Amazon s’hè digià tombu e librerìe di prussimità. Oghje s’hà da ingullisce mondu pìcculi cumercii ch’ùn puderanu sopravive à ssa crisa ecunòmica è suciale tremenda. D’appressu à i studii, per un impiecu creatu da Amazon, sò trà 2,2 è 4,6 impiechi chì sò strutti nant’à i nostri territorii. Adduniti ind’un cullettivu, persunalità pulìtiche, culturale, associi ambientali o di sulidarità, urganisazioni di cunsummatori, federazioni di cumercianti è citatini spàrghjenu una petizione per un Natale senza Amazon. Sott’à u slogan « Perch’è ci sò altre suluzioni, quist’annu festighjeghju #NoelSansAmazon », chjàmanu tutt’ognunu à raghjùnghjeli. «A crisa sanitaria chè no campemu hà cunsequenze dramàtiche in Francia» dice a petizione, «millaie d’impiechi sò spariti, a disuccupazione tocca 9% è un millione di personi sò cascati in a puvertà.» A petizione dinunzia « i nostri modi di prudduzzione, mundializati è a nostra cunsumazione di risorze naturale sragiunate. Per sorte di ssa crisa, ci tocca à ritruvà duie cose : a nostra suvvranità naziunale è aurupea, è u nostru spìritu di sulidarità. » Sè tutt’ognunu s’impegna per ssi dui puntelli, si puderà salvà mondu cumercianti di prussimità. A petizione spieca chì Amazon è ssu modu di cumprera hè predaghju di u pìcculu cumerciu, ma dinù di e terre è u spàziu. I casamenti oghje in prugettu di custruzzione per Amazon anu da occupà 2 millioni di metri quadrati in Francia, vale à dì 185 terreni di ghjocu à pallò. Predaghju dinù d’aiutu pùblicu, cù l’infrastrutture pùbliche ch’ellu abbisogna Amazon per campà senza puru partecipà à u so finanziamentu. In più, a multinaziunale ùn paca micca impòsiti in Francia (micca TVA) è si face puru un sciffru d’affare di 7,7 milliardi d’àuri in Francia sola !
A petizione chjama à a ghjente à ghjòvesi di l’alternative messe in òpera, cum’è u « pichju è cullettu » (click & collect) di i nostri cumercianti cunnettati ch’anu messu in ballu sistemi per arricà a marcanzìa. A petizione dumanda lege per prutegge è aiutà i cumerci di prussimità.
Allora, voi dinù, fate di e feste un mumentu di spartera è di sulidarità : passate Natale senza Amazon ! Zifrate è sparghjite a petizione : noelsansamazon.wesign.it/fr •