Senza nome

Simu tutti l’eredi di qualchisìa chì venìa da qualchi locu… U babbu di mamma era fughjitu da l’Italia fascista sott’à Mussolini perch’è e camisge nere dumandàvanu à i ghjòvani di calà u capu quand’omu li cruciava in carrughju. Ellu, invece, i fissava in zerga ind’è l’ochji… si sò messi à ricercalu. Babbone hà fattu a so vita in Corsica cù moglie è figlioli, parlava è campava corsu, puru sempre cù un pezzu di u so core firmatu in Massa… A Corsica, ìsula in cor’di Mediterràniu, hè cusì terra crucivìa induve si sò imbullighjate culture da tutte e mamme dapoi ch’ella esiste l’ìsula. Etruschi, grechi, rumani, vandali, bizantini, sarasini, pisani, genuvesi, francesi, taliani, purtughesi, berberi sò ghjunti à fà a so vita quì… è ancu quand’ellu era per cunquistacci, cù putenze militare è pulìtiche, si sò fatti Corsi è anu impastatu cù i sèculi ciò chì face l’ànima corsa oghje. Ciò ch’imprema pè e sucietà hè u sguardu cumunu lampatu nant’à l’orizonte, e brame cullettive d’avvene, micca u culore di pella. Oghje sempre cum’è eri, ghjùnghjenu l’omi da l’Àfrica, l’Auropa o qualchi pezzatellu di a pianetta per fà a so vita quì. L’urìgine di u mondu hè ind’è e migrazioni. Hè a so forza è a so richezza. Ssu 19 di maghju, una trentina di persunalità frà e quale u premiu Nobel di literatura Jean-Marie Le Clezio, u sturianu Pascal Blanchard, l’anziana ministra Christiane Taubira è parechji altri, anu lampatu una chjama à « a fraternità » pè i migranti. «U Mondu hè in traccia di perde a quarta guerra mundiale contr’à sè stessu » dìcenu ss’omi è sse donne nutriti di sperienze forte.

A stòria di l’omi s’hè fatta da e migrazioni. A civilisazione rumana hè stata fundata da Enée, un strangeru ghjuntu da l’Asìa. U premiu Nobel di literatura, Jean Marie Le Clezio hà francatu a so zitellina piattu ind’è l’Alpe, fughjendu l’Allemani è conta cumu a so stòria li permette di capisce sta ghjentarella oghje chì cerca à francà u Mediterràniu per truvà agrottu in Auropa. Mireille Delmas-Marty, prufessore à u Cullegiu di Francia chjama à un «Manifestu pè una mundialità appaciata » per cummemurà i 70 anni di a Dichjarazione universale di i diritti di l’omu. Sarebbe un bellu sìmbulu. U sensu di l’uspitalità deve esse universale è avè un pesu ghjurìdicu, rettu à u livellu mundiale. E sucietà muderne dèvenu travaglià à sbarazzacci di l’odiu, e chjusure è e paure chì spìccanu u mondu. Anu, ghjurnalisti allemani anu publicatu nant’à u ghjurnale Der Tagesspiegel, una lista di 33.293 migranti morti pruvèndusi à raghjunghje l’Auropa. Longa lista di 48 pàgine… «Vulìamu ramentà chì daretu à ogni lìnea ci hè una stòria, è chì ssa lista cuntinueghja à allungassi ghjornu dopu à ghjornu, per vìa di e lege cuercitive appiecate in Auropa »… Samuel di u Congò, Nouhou Doumbia di u Mali, Faisal Imran di u Pakistan… ùn goderanu mai di l’avvene ch’elli sò ghjunti à circà ind’è noi. È, cù elli, parechji chì pòrtanu u nome di « nomen nescio », senza nome.

Fabiana Giovannini.

1 Trackback / Pingback

  1. Stampa Corsa, informations corses – Senza nome

Les commentaires sont fermés.