Ogni annu, l’urganisazione internaziunale Global Footprint Network calculeghja u ghjornu induve a pianetta franca e so capacità d’assume ciò ch’ella cunsuma. Vale à dì u ghjornu induv’ella trapassa e risorze naturale ch’ella pò ricustituisce…
Annu, era u 2 d’aostu. In u 1997, era di sittembre, in u 1985, era di nuvembre… è in u 1970, vale à dì menu di 50 anni fà, a biocapacità di a terra à suppurtà i nostri bisogni era pusitiva. Global Footprint Network face dinù ssu contu per 200 paesi è territorii in u mondu. Pè a Francia, u ghjornu di u trapassamentu hè cascatu quist’annu u 5 di maghju, trè mesi nanzu à u ghjornu mundiale. Paese dettu sviluppatu è civilizatu, invece di fà cresce u livellu, a Francia face rinculà a pianetta ! Dapoi u 2015, i Francesi sempre pronti à dà lezzioni di murale à u mondu sanu, spèndenu senza cuntà e so risorze è cun elle quelle di a pianetta. Simu in pèrdita eculògica. Sè u mondu campava cum’è i Francesi, ci volerebbe 2,9 pianette da pudè cunsumà i nostri bisogni ! I Francesi dumàndanu à a natura 1,8 di più ch’elli ponu pruduce i so ecusistemi terrestre e marini. Vale à dì, campemu à crèditu ! È a pianetta ùn hè micca una banca chì pò pruduce soldi quand’ella n’hà u bisognu. Quand’ùn ci hè più biodiversità, ùn si rinasce micca. Ssa stampa eculògica negativa di a Francia vene pè u più da a so alimentazione, è e spese in energia ind’è l’alloghju è i trasporti. Li tocca à piglià misure ambiziose à prò d’una mubilità è d’un energìa durèvule, di a priservazione di a so biodiversità, di a lotta contr’à a sfurestazione, ricusendu l’impurtazioni chì ne sò rispunsèvuli. Di sicuru, ci hè peghju per disgrazia.
U ghjornu di u trapassamentu à u Qatar casca u 9 di ferraghju, à i Stati Uniti, u 14 di marzu, à u Canadà u 17 di marzu, in Sueda, u 3 d’aprile, in Russia, u 20 d’aprile, in Allemania, u 1u di maghju… L’Inglesi face un pocu megliu u 7 di maghju, a Spagna u 10 di ghjugnu, u Portugale u 15 di ghjugnu. È sò i paesi menu sviluppati chì fàcenu di più: a Culumbia franca u so ghjornu di trapassamentu u 16 di nuvembre, u Marroccu u 16 di dicembre è u Vietnam u 20 di dicembre !
A stampa carboniu di a Francia raprisenta più di a metà di a so stampa eculògica, ingattivita da 5% st’ùltimi trè anni. L’urganisazioni internaziunale WWF è Global Footprint Network s’impenserìscenu di u livellu di l’emissioni à effettu di serra è dinùnzianu u pocu laziu di i Francesi à vulè entre in a transizione energetica.
Li tocca à esse più vuluntarii à mette in ballu «una strategia di lotta contr’à u so dèbbitu eculogicu » dice WWF. «Un impresa chì spende ogni annu di più ch’ella vince, s’appronta à prublemi gravìssimi ».
Sè a Francia ch’hà accoltu a cunferenza di l’Accordu di Parigi nant’à u climà è chì rivendicheghja d’esse u capifila di a lotta contr’à u riscaldimentu climàticu, ùn hè capace di fà sforzi… ci hè di chè addisperassi di u restu di u mondu.
Fabiana Giovannini.