Stirpera

L’aviò di Bashar Al-Assad anu bumbardatu torna e pusizioni di i ribelli siriani in a regione di u Ghouta orientale à l’este di Damas tumbendu quasi un centu di civili frà i quali una vintina di zitelli, è fendu più di 300 feriti. Una vera stirpera. Dighjà sò morti 250 personi u 5 di ferraghju scorsu. Dapoi sette anni ch’ella duri, sò decine di millaie di morti.

I Nazioni Uniti anu dumandatu ch’elli piàntinu sùbitu i bumbardamenti aèrei siriani, «a situazione umanitaria di i civili in u Ghouta orientale hè fora di cuntrollu » dice u cuurdunatore di l’ONU per l’aiutu umanitariu in Sirìa, Panos Moumtzis, «ci vole à piantà sta suffrenza umana tremenda ». Tutti i ghjorni, piòvenu e bombe culandi.

Ind’è l’uspidali di campagna, si vèdenu i parenti persi è addisperati circà un ciucciu, mortu o vivu. Fughje, ùn ponu più. A ghjente si piatta in e cave, ma ùn ponu aggrutassi indocu vistu a putenza è a frequenza di e bombe.

Secondu à l’Osservatoriu sirianu di i Dritti di l’Omu s’appronta sicuramente un offensiva terrestra malgratu i neguziati cù i ribelli islamisti da ch’elli si rèndinu. Bashar vole fà piantà i tiri di rucchette nant’à a capitale Damas. Hè cumplicata a situazione trà i ribelli islamisti di parechji gruppi djiadisti, l’upunenti à Bashar Al-Assad, e putenze internaziunale chì si sfìdanu, i Curdi siriani ch’anu liberatu a regione curda d’Afrine, à u nordu di Damas, è a Turchìa chì ci mette u so nasu ancu ella.

Franchendu a fruntiera, cù un uffensiva lanciata u 20 di ghjennaghju, prova à ricuperà Afrine è minaccia di guerra a Sirìa s’ella intervene.

Ghjè in ssu cuntestu quì ch’ellu hè mortu Olivier Le Clainche, chjamatu Kendal Breizh u 10 di ferraghju.

Avìa decisu di raghjunghje i cumbattenti curdi di lugliu 2017, per aiutali à a so manera à cumbatte contr’à Daesh. «Ghjè per raggione umanitaria » avìa dettu, per sustene ssu pòpulu curagiosu è abandunatu da a cumunità internaziunale. Quand’elli anu avutu u bisognu d’una forza di sustituzione per cumbatte à u Statu Islamistu, Russii è Americani èranu belli cuntenti d’appughjassi nant’à elli… I Curdi si sò upposti di manera eròica cù a so pìccula armata d’omi è di donne curagiose, è anu liberatu à Kobané, ripigliendu un’à una e pusizioni di l’islamisti. Dopu à ssa longa battaglia, i Turchi n’anu prufittatu per cunduce un offensiva contr’à i Curdi, appughjèndusi nant’à ciò ch’elli chjàmanu « l’armata siriana lìbera » chì sò djiadisti di u Statu Islamicu o d’altri gruppi di stess’andatura. In fatti, Erdogan prufìtta di ssa guerra per sbarrazzassi di i Curdi. U mondu si muverà per elli ?

Per avà, nè l’Americani, nè i Russii, nè l’aleati aurupei ùn mèttenu manu in pasta. Puru senza i Curdi, Daesh puderebbe ancu ripiglià fiatu…

Sò 340000 morti in Sirìa dapoi u principiu di a guerra.

 

Fabiana Giovannini.

1 Trackback / Pingback

  1. Stampa Corsa, informations corses – Stirpera

Les commentaires sont fermés.