Tamanta strada !

U10 di dicembre 2016, in Bastia, à u Teatru, Arritti festighjava i so 50 anni. 50 anni di publicazioni, di lotte è rivendicazioni. 50 anni di vita di u nostru pòpulu. Chjamava tandu u nostru ghjurnale à un dibattitone trà e cumpunente di Femu a Corsica è a necessità d’apre una pàgina nova di a nostra stòria. Un annu dopu, u 10 di dicembre 2017, u secondu giru di l’elezzioni territuriale cunsacra a crèscita di u naziunalìsimu aldilà di tutte e nostre speranze. Più di 56 % è una maghjurità assuluta : i Corsi ci anu dettu a so ricunniscenza è a so cunfidenza in un votu d’adesione magnìficu! È per gode tuttu ciò ch’ellu raprisenta ssu mumentu, ci vole à ammentassi i 10 anni scorsi. 10 anni fà, u naziunalìsimu era in mille pezzi è in rivugliu, dopu à l’annate di cunflitti è e guerre fratricidie. L’assassìniu di u prefettu Erignac, a ripressione è l’accuse di « pòpulu prefetticidiu », avìanu sparsu disturbu è addisperu, aprendu à l’affaccata d’un « omu ch’ellu ci vole induv’ellu ci vole », è e catastrofe ch’ellu ci hà purtatu… U riferendum di u 3 di lugliu 2003, ellu, avìa rinfurzatu torna u clan è ci avìa affundati per parechji anni in un statu quo tremendu. Tamanta strada !

A spressione hè forte micca solu perch’ella indita u caminu longu di strazii è làcrime ch’hè statu fattu ssi 50 anni. Ma dinù perch’è conta l’addisperu di a situazione induve no èramu dopu à tanti mumenti diffìciuli… U naziunalìsimu avìa persu a cunfidenza di u so pòpulu è quale pudìa imaginà truvà abbastanza forza per custruisce una vittoria cusì bella 10 anni dopu ? Ùn hè què a più bella dimustrazione di l’esistenza d’un pòpulu ? A so capacità à rileva si sempre, malgratu i guai è l’offese ?

Oghje, simu chjamati à d’altre sfide. Un paese da fà, è 10 anni torna in mira per custruìscelu ! Sò parechje e priurità. Prima di tuttu a nostra cuesione hè impurtantìssima. Bisognu à tene lea trà di noi, è cù u nostru pòpulu. Per quessa, bisognu à strutturà a lotta cù un partitu di guvernu. Femu a Corsica hè statu creatu. Ci tocca à dalli vita è ch’ellu appia rilazioni sodde cù i partenarii di Corsica Lìbera. In listessu tempu ci tocca à risponde à l’attese cutidiane di u nostru pòpulu, frà e quale e priurità suciale è di u riacquistu ecunòmicu. Ci vole à porghje manu à i più pòveri è fà chì u nostru pòpulu partecipeghji à a custruzzione di u so paese. Infine, a Cullettività ùnica da mette in ballu è e discussioni da cunduce cù u Statu per strappà l’autunumia. Ùn hè chè cusì chì e vittorie eletturale diventeranu vittorie pulìtiche.

Tamantu travagliu !

 

Fabiana Giovannini.

1 Trackback / Pingback

  1. Tamanta strada !

Les commentaires sont fermés.