Techja !

Dapoi trè mesi ùn si parla, ùn si campa, ùn si beie, ùn si manghja, ùn si dorme, chè di Covid ! A nostra vita sana s’urganizeghja in giru à u coronavirus è ùn si parla chè di què. Macron, Edouard, Varan. Varan, Edouard, Macron!

Cunsigliu scientìficu di quì, laburatorii di quà.

Raoult è micca Raoult ! Ùn ci hè più guerra in u mondu, ùn ci hè più fame, nemancu miseria o catastrofe. Ùn ci hè più mafia, ùn ci hè più arrubbecci, nemancu morti nant’à e strade. Ùn ci hè nè timpurale, nè sicchina, nè terramoti, nè vulcani chì si svèglianu, ùn ci hè più estinzione di massa, nemancu riscaldimentu climàticu, ci hè u Covid !

Ùn ci hè più ghjorni festivi, nè Pasqua, nè primu di maghju, nè manifestazioni, nè voglia di manifestà, nè maglietti gialli. Ci hà pigliatu tuttu, a salute è l’amichi, arrubèndusi vite care, fendu soffre i nostri anziani, spicchènduci, fènduci paura à mezu à l’amichi, à mezu à i parenti. Ci hà pigliatu basgi è abbracciachimi, sussuri ind’è l’arrechje, zitelli appicollu, ciucci à sughje, mani nant’à e spalle, strinte di mani, diti ind’è u nasu, scuzzulate è ancu calci è pugni ! Ci hà pigliatu intarri è matrimonii, battèsimi è cumunioni, seratoni in famiglia o trà l’amichi, pranzi in i risturanti, briachine, spassighjate tranquille, scialalate in cafè, cuncerti è festivali, mùsica è teatri, sinemà, sport cullettivi, partite di caccia, ghjocu à pallò, è ancu u Sporting !!! Ci hà cacciatu a voglia di travaglià, è a voglia di stà in casa, e cumprere di scarpi è vistiti, è ancu l’elezzioni ! Ci hà presu a cunfidenza, i surisi offerti à nimu, e cumplicità, a voglia di dì bunghjornu, a cunvivialità, u cuntattu umanu, è ancu l’accarezza à i misgi ! Ci hà rigalatu in iscambiu ghjente ansiosa è azeza, corse à i maschi, prezzi affuculati, guanti ghjitatti in carrughju, code à i magazini, estri rugniconi, incertezze è paure, è pruviste di papè pè u cabinetu, une poche di scimizie sì ! A crisa hè da tutte e mamme, sanitaria, ecunòmica, suciale, pulìtica, pulèmica, serà ancu da quì à pocu ambientale, cù tuttu stu plàsticu fabricatu, trà bluse, maschi, guanti, plexiglas, signaletica, è imballasgi à buzeffu ch’ellu ci tuccherà à ghjittà, brusgià, o sottuterrà… senza cuntà tuttu ssu ghjelu idroalcòlicu è disinfettanti da tutte e mamme ! Pòveri à noi ! Pòvera pianetta !

Sapete, eiu, o ghjente… n’aghju una techja !

Fabiana Giovannini.