Accapu di a reddazzione

U novu Vescu

L’infurmazione ùn hè stata tantu sparsa… eppuru a Corsica aspettava dapoi parechji mesi u so novu Vescu ! Si chjama François-Xavier Bustillo è ghjè franciscanu !

Chè vo sìate o nò cattòlicu, chè vo sìate o nò cristianu, hè un evenimentu. U Vescu face parte di e persunalità d’un paese. Hà una parulla, in generale ascultata, dunque ch’hà un certu pesu in a sucietà. Ùn face pulìtica à u sensu ch’omu a cunnosce, ma piuttostu (o duverìa esse cusì) à un sensu nòbile, postu ch’ellu sparghje una parulla micca solu religiosa, ma una parulla di citatinanza è di a vita in ssa sucietà. Face ch’ellu hè sempre impurtante di cunnosce a so persunalità è ciò ch’ellu puderà porghje à l’affari cutidiani di l’ìsula, curendu e nostre ànime, ma dinù e nostre brame. Per avà simu troppu à bon’ora per sapè s’ellu serà un Vescu chì cunterà cusì ind’è l’affari di a Corsica. Ma e so prime parulle pàrenu piuttostu interessante. « Ùn vengu micca quì per rege i Corsi, ma per tèneli caru » dice Francescu Saveriu. Affaccatu da Lourdes, hè d’urìgine spagnola, o piuttostu basca, postu ch’ellu hè nativu di Pampeluna. Hà 52 anni è hà fattu i so studii in Padova eppò Tulusa. Hè statu urdinatu prete in u 1994 è hà fattu i so primi sermoni in Narbonne. Stallatu in Lourdes dapoi u 2018, vene à piglià a sèguita di Munsignore De Germay in Corsica è serà pè a prima volta Vescu. Piglierà ufficialmente e so funzioni u 13 di ghjugnu pròssimu, ghjornu di a festa di Sant’Antone ! Hè un cumunicante, ci hà già mandatu parechji messagi nant’à youtube ! Hà palisatu dinù i so sentimenti à u nostru cunfratellu Corse Net Infos, per dì ch’ellu era felice di ghjunghje in Corsica : « hè una felicità per mè di principià quì una aventura nova cù personi novi in una dimarchja spirituale è culturale. Ùn vengu micca per rege i Corsi, ma per tèneli caru. A vita a sapete, ghjè rìsicà, pruvà… A mo vita di prete hè sempre stata risicata. Ùn ci vole micca à limità l’esistenza umana à pienghje. Ci tocca à avè curagiu è creatività alleata à a tradizione »… Chì si pò leghje in sse corte parulle ? U Vescu pare scrìvesi ind’è l’azzione, ricunnosce è ama a cultura è e tradizioni particulare di a Corsica. « Vengu di u Nordu di a Navarra à cantu à u Paese Bascu, un paese chì hà ràdiche culturale sodde cum’è in Corsica. »

« Mi pruveraghju ind’è voi è cù voi chì vogliu campà cù passione una missione. S’omu ùn campà micca a so missione cù passione, u rìsicu hè fàciule di lamentassi, pienghje, more, sparisce… Ampareraghu à staccami di a mo famiglia franciscana chì m’hà datu tuttu è m’hà furmatu. Ma scupreraghju una vita nova, una tappa nova, chè no camperemu inseme… Ghjè ind’è voi ind’una terra induv’ellu ci hè belle tradizioni ch’anderaghju à scopre ciò chè vo site, ciò chè vo campate è d’induve vo venite. Ci sò cunfraterne. Ind’una sucietà incrispita, incruchjata, a dimenzione di a fraternità, di l’amicizia, di a sulidarità, sò impurtante. Sta dimensione hè da accumpagnà, à campà è à scopre… Ùn sò micca un merre, un deputatu, un vengu micca cù un prugramma è cù prugetti. U prugramma è i prugetti i faremu inseme. Ma vengu quì cù edee, brame è vuluntà di custruisce inseme… Sò quì per offre ciò ch’eu sò, ciò ch’eu campu, ciò ch’eu cunnoscu… Inseme faremu avvanzà a ghjesgia. »

Li auguremu a benvenuta è un bon’sacerdoziu in Corsica ! •

Fabiana Giovannini.