Umanìsimu criminalizatu

Khadim Diop hè un Senegalese di 24 anni frà i 42 migranti di u Sea Watch 3. Hà cuntatu a so stòria à a currispundente di Euronews, Giorgia Orlandi.

Partutu da u so paese di sittembre 2017, hè statu arrestatu in Libìa un mese dopu per esse vendutu cum’è schiavu. Quelli chì u s’anu pigliatu dumandàvanu 5000 dinari à a so famiglia (vale à dì quasi 15.000 àuri) per cappialu. Minatu, eletrocuttatu, hè riesciutu à scappà in 2018. Ghjuntu in Libìa, ci hà campatu dui anni pruvendu parechje volte à francà u Mediterràniu. U 12 di ghjugnu, hè statu salvatu da u Sea Watch 3 cù 52 altri disgraziati. Carola Rackete, a so capitana hà pigliatu a strada di Lampedusa, u portu aurupeu u più vicinu di a Libìa. 11 malati sò stati trasburdati ma 42 sò firmati 17 ghjorni abbandunati in mare, cù poca roba da manghjà, impediti di sbarcà in Italia. «A capitana ci incuragìa è ci avìa prumessu ch’ùn vulterìamu micca in Libìa. A sciaccamanemu, hè una bona persona » dice Khadim Diop. «Hà fattu assai per noi, ci hà salvatu da i Libiani chì vulìanu ricuperaci. Li hà dettu di nò» dice torna Khadim, chì, malgratu u blucchime talianu, tene ragiunamenti rispunsèvuli. « Si pò capisce, ci hè a crisa dapertuttu in u mondu, l’Allemagna, a Francia, tutti dèvenu piglià a so parte » dice u migrante. Conta dinù e realità di e bande armate chì tortùranu è sprèzzanu a ghjentarella, parlendu di a schiavitù. « Tuttu u mondu a sà, si vende a ghjente, pìglianu i neri, ma dinù l’Egiziani, i Tunisiani, tutti. Ti pìglianu, ti piàttanu in una casa scartata, ti mèttenu solu ind’una stanza cù un telèfonu è fili dapertuttu. È ti dìcenu “chjama a to mamma è u to babbu da ch’elli ti màndinu soldi”. Sè tù ùn a faci mica, ti mènanu è minàccianu di tumbati. È quand’è tu chjami, mèttenu u currente da chè tu mughji è chì i to parenti àppiinu paura ».

Ind’è a nuttata di u 28 à u 29 di ghjugnu, u Sea Watch hà furzatu u blucchime talianu per entre in u portu di Lampedusa in Sicilia. Carola Rackete, capitana di u bastimentu hè un eroe di i tempi d’oghje. Di pettu à u disprezzu è l’indiferenza di u mondu sanu, hè andata à l’incontru di i migranti per salvali da i Libiani è da l’annigamentu. Li ci hè vulsutu curagiu è forza torna per dà di pettu à l’autorità taliane chì chjòdenu i so porti. «Avemu aspettatu senza vede suluzione. Per quessa ch’aghju decisu d’accustà in u portu» dice Carola Rackete.

Hè stata arrestata, pò cappiata, risichendu 10 anni di prigiò è 900.000 àuri d’amenda per avè salvatu 53 vite umane.

U prucessu d’un antra capitana, Pia Klemp, è di 10 altre personi hà da principià da quì à pocu in Italia. À bordu di u Iuventa, avìanu salvatu 14.000 personi trà 2016 è 2017. L’acchjappu di i battelli, l’amende, u rìsicu di prigiò, l’umanìsimu hè diventatu un crìmine. Cum’è Carola, cum’è Pìa, inseme dimu Nò.

 

Fabiana Giovannini.

1 Trackback / Pingback

  1. Stampa Corsa, informations corses – Umanìsimu criminalizatu

Les commentaires sont fermés.