1700 personi dapoi u principiu di a mossa di i curpetti gialli sò state ferite da e forze di l’òrdine.
À le volte gravamente ferite, è ancu di manera irreversìbile.
11 sò morte tocche da una vittura impaziente è in zerga nant’à i crucivìa di e scuntentezze. 11 mamme è babbi di famiglia ch’ùn vulteranu mai più in casa soia. Parechji torna anu persu una manu, un ochju, una massella, un timpanu… mozzi, sfigurati, marcati pè a vita da ssi trè mesi di manifestazioni in u freddu è u disprezzu per scumbatte a misèria di e so vite. Uni pochi ùn èranu mancu manifestanti, ma sèmplice passanti o ghjurnalisti. U presidente di a Repùblica ùn hà mancu avutu una parolla per elli. Da u Caire induv’ellu hè andatu à visità u regime dittatturiale di Al Sissi, s’hè lamentatu di l’11 morti dapoi u principiu di u muvimentu di i curpetti gialli, ma hà dettu ch’ellu ùn era colpa di i pulizzeri ch’ellu hà ludatu pè u so « prufessiunalìsimu ». Umbeh! Nisun’parolla o pensata pè i feriti è i struppiati. 1700 personi nigate, sprezzate… L’ùltimu feritu hè un rispunsèvule di i curpetti gialli, Jérôme Rodrigues. Nant’à a so pàgina Facebook, ci hè u filmettu in live ch’ellu era in traccia di fà quand’ellu hè statu toccu da un tiru, di flashballu o di granata, per avà ùn si sà di chì gèneru era u pruiettile. Ma hè statu tiratu torna da a pulizza, nant’à un omu chì filmava a manifestazione, chjamendu senza arrestu à u calmu, diciendu à i curpetti gialli d’ùn andà à circà i pulizzeri, chjamènduli à andà à scambià di locu per scartassi di l’azzuffi in traccia di nasce per vìa di i black-blocchi, ssa ghjente vistuta di nera è coprifacciata chì vene à sciappà tuttu ind’è e manifestazioni. E prove, sò ind’è u filmettu. Andate po à fighjulalu. Jérôme Rodrigues era statu identificatu dapoi un pezzu da e forze di l’òrdine chì sapìanu ch’ellu ùn era periculosu. S’ellu hè statu toccu da ssu tiru assassinu chì li hà schiattatu un ochju, ùn serà puru azardu. Serà torna pruvucazione è vuluntà di terrurizà. Sò mondu i filmetti di l’agressioni pulizzere à longu à i sàbatu chì sfìlanu dapoi 11 settimane avà. Ss’omu chì gira u spinu à a pulizza per andàssine, fighjendu in daretu è toccu da un tiru à l’ochju anch’ellu. Ss’omu chì marchja tranquillamente è ch’hè chjappu da quattru pulizzeri di a BAC, a brigata anti criminalità, lampatu in terra, ammanichjatu i mani ind’è u spinu senza resistenza, un pulizzeru addossu, u so ghjinochju nant’à e spalle, eppuru, un antru chì vene à pichjali u capu viulamente à parechje volte nant’à l’astracu per schiattali u nasu. Ss’omu in futtogliu lampatu in terra. Ssa donna chjappa pè i capelli è strascinata nant’à parechji metri… donne, omi, vechji, ghjòvani, sciaccati di colpi… a pulizza di u paese di i diritti di l’omu! U rispettu nasce da u rispettu, micca da e viulenze cecche è da l’eccessi di putere.
Fabiana Giovannini.