Ssu 4 di lugliu, una squadra d’Arritti hà da corre à a Currilingua ! Evviva a nostra lingua !
U Cullettivu Parlemu Corsu hà lanciatu a Currilingua, una corsa di 90 chilòmetri chì parte da U Borgu sin’à Sulinzara. Personi à tìtulu individuale, intraprese, stituzioni, cumune, associi, club spurtivi, si sò scritti è sò quasi 150 scrizzioni è parechje centinaie di ghjente dunque ch’anu da corre, purtendu un « testimognu », sìmbulu di a tramandera di a nostra lingua trà tutti ! Hè una bella rièscita per ssa prima prova.
Frà i participenti, da nutà una squadra di l’associu Scola Corsa per l’insignamentu immersivu di a nostra lingua, l’assistenti parlementarii di l’aurudeputatu Francescu Alfonsi, gruppi cantarini cum’è l’Arcusgi,
I Chjami Aghjalesi, I Surghjenti o Svegliu d’Ìsula, scole cum’è e Scole Defendini è Subissi in Bastia, cumune cum’è quelle di Biguglia, Furiani, U Borgu, Cannavaghja, San Niculau, Suddaccarò, Sarra di Farru, Ghisunaccia, Prunelli di Fium’Orbu, Serra di Fium’Orbu, a cunfraterna di Santa Croce di San Fiurenzu, spenghjifochi da parechji paesi di l’ìsula, associi cum’è Praticalingua, I Chjassi Muntagnoli, u Tavagna Club, U Svegliu Cerviunincu, pò dinù une poche d’intraprese, l’Università Pasquale Paoli, stampe cum’è Arritti, Corse-Matin o a Ràdiu Alta Frequenza, spurtivi cum’è l’AJB, u GFCA Atletìsimu d’Aiacciu o Prupià Atletìsimu, e cumunità d’agglumerazione di Bastia è d’Aiacciu, è mondu altri participenti chè vo pudete ritruvà nant’à u situ di parlemu corsu.
U scopu di ssa corsa hè di racoglie soldi per sustene prugetti à favore di a nostra lingua. « Ci pò essa prughjetti cum’è a rialisazioni d’un centru d’immersioni, pò essa dinò a tradduzzioni d’un filmu, o allora u sustegnu à una scola assuciativa o realisazioni d’una ràdiu. ma prughjetti chì sarìani maiò è ch’anu bisognu d’un aiutu finanziariu daretu » ci spieca Micheli Leccia, u presidente di Parlemu Corsu. « U scopu hè di mustrà a nostra vulintà, di firmà indipendenti indi i prughjetti è di riescia à mubilizà u pòpulu corsu nù a so tutalità. Hè una corsa chì si voli fistiva, chì voli impignà u più pussìbuli d’aienti è chjamata à crescia d’una annu à l’altru. »
Arritti invita i so lettori à seguità ssa corsa, à vene ancu nant’à u parcorsu à sciaccamanà i partecipanti è sustene tutte l’iniziative à favore di a nostra lingua. •