I Stati Generali di a lingua corsa princìpianu stu sàbatu 9 di ferraghju a 2 ore dopu meziornu, a l’anfiteatru Landry di l’Universita di Corsica. So urganizati da l’associu studientinu Cusì. U scopu he di mette in ballu una seria d’azzioni pe u 2019. Sei gruppi di travagliu so urganizati, da u cantu e a musica, a l’imparera di a lingua, i Media e Internet, u cumerciu, u Sinema, u Teatru e u mondu artisticu, a manu di l’omu.
Tutte e manere d’imparà a lingua sò da prumove, da urganizà è da sustene.
U scopu hè di riflette nant’à a piazza di a lingua ind’è a nostra sucetà, è fà ch’ella si sparghji di manera naturale. Per quessa, ci vole à entre in u cuncretu di e situazioni è dà mezu à a ghjente di riacquistala, offre i spàzii da pudè aduprala. I gruppi di travagliu sò stati scelti cusì, da culmà e mancanze, e custrinte, o l’appreensioni da tutte e mamme. Per un dettu, pè u cantu è a mùsica, riflette à cumu creà mèttudi scritti è audiuvisii d’imparera.
Per l’imparera, fà a racolta di tuttu ciò chì permette d’aduprà a lingua, sviluppà libri, lèssichi o arnesi sculari o nò, sviluppà modi interattivi cum’è e-learning, sparghje tutti l’urdigni pussìbuli.
I mèdia sò dinù una manera indispensèvule da mette in ballu. Si sà u rolu maiò ch’elli ponu avè in u riacquistu è a valurizazione di a nostra lingua.
In u cumerciu, induve mondu a ghjente passa è vene, sparghje a lingua hè un rinforzu d’efficacità. Ci tocca à aiutà i cumercianti, è furmà i so impiecati, da ch’elli spàrghjinu anch’elli a nostra lingua di manera cutidiana.
U Teatru, u sinemà, e raprisentazioni artìstiche in generale, sò mezu dinù di pupularizà a lingua è di dalli una piazza impurtante. Hè una manera di demucratisazà a lingua, da ch’ella tocchi tutti i pùblichi.
Infine, u mondu di u travagliu, « a manu di l’omu », hè indispensèvule da fà chì una lingua ritrovi tutta a so piazza in a sucetà. Mondu agrìculu, artisginatu, cultura, imprese, fà a lea trà a lingua è l’ecunumìa hè una carta maestra per riesce a sfida di ssu riacquistu linguìsticu. Eccu l’impegnu !
U PRUGRAMMA
2 ore dopu meziornu
Durante u primu tempu, a l’anfiteatru, prisentazione precisa di u scopu di ssi Stati Generali. A parulla sara data dopu a u publicu, in priurita a l’associu.
3 ore
Parechji gruppi di travagliu, cu referenti e secretariu, saranu aduniti a longu a duie ore di riflessioni nant’a l’azzioni cuncrete da mette in ballu per l’annu 2019.
5 ore Pausa
5 ore è quartu
Conturesu di i gruppi di travagliu da ogni referente, e messe in ballu d’un calendariu d’azzioni per 2019.
6 ore
Cunfarenza di stampa di fine di ssi primi Stati General.