Maestru di Cunferenza à l’università di Corsica, membre di u centru di ricerca UMR CnRS LISA, Rumanu Colonna scrive, riflette è analiseghja a situazione pulìtica è linguìstica di a Corsica. E so ricerche si cuncentrèghjanu assai nant’à a nostra lingua, u so funziunamentu suciale, u fattu di minuranza o di duminazione linguìstica. Hà publicatu, frà altru, « Les paradoxes de la domination linguistique » in u 2013, «Des paroles, des langues et des pouvoirs » in u 2014, è oghje, ci prupone « Pour une reconnaissance politique des langues ». Una bella riflessione da leghje.
Sè vo cuntrastate cù Rumanu Colonna, vi parlerà di sicuru di a Corsica assai, chì u circatore, u scrivanu, è dinù u cunsigliere territuriale Femu a Corsica, hè appassiunatu di pulìtica, ma ùn ghjunghjerete à a fine di una cunversazione cù ellu senza parlà di u bisognu di cuufficialità per riacquistà una lingua ! A lingua corsa, è aldilà tutte e lingue minurate, sò in core di i so penseri è di e so ricerche d’universitariu.
Lingua minurata, supranata, disprezzata, minacciata, è in perìculu, a nostra lingua trova in Rumanu Colonna un avucatu. È, cum’è tutti l’avucati, travaglia assai u so cartulare ! Studieghja dapoi ch’ellu hè studiente è ùn s’hè mai piantatu da pudè avvicinà, capisce, scurticà i mecanìsimi umani, suciali, pulìtichi chì fàcenu chì una lingua perde u so fiatu è si trova minacciata. Puntellu di a nostra identità, a lingua corsa hè in prima lìnea di pettu à a messa in mira di u Statu francese è di a so sacrusanta Custituzione giaccubbina.
Custruita nant’à una religione monolinguìstica, a Francia ùn arriesce à addimette a diversità linguìstica. Pudete disciulà quant’è vo vulete, argumentà è spiecà e cose di manera scientìfiche, a quistione hè pulìtica. Hè ciò ch’ellu spieca in a so nova riflessione nant’à l’avvene di a nostra lingua, Rumanu Colonna. À traversu una cinquantina d’argumenti, pone a dimustrazione chì l’affare sò in francese, un prublema di troncabracciu pulìticu. Nè a Custituzione, nè l’analisa ghjurìdica, nè a nurmalità aurupea è ancu mundiale, nè u bon’sensu, è ancu di menu a legittimità, ùn sò tràmpalu per ghjunghje à ssa cuufficialità ch’ùn hè chè cosa nurmale. È cusì vi spiega cù pazienza è determinazione chì a lingua hè « una custruzzione suciale », è chì a cuufficialità ghjè « custruisce », chì circa 200 Stati è 5000 lingue sò cuncernate da u plurilinguìsimu, vale à dì « hè a norma ! » Pruclama torna Rumanu Colonna, chì dice, ùmile è cunvintu, ch’ellu ci serà « in 2050, 750 millioni di francofoni in u mondu ». Cioè « a cuufficialità per 300.000 locutori ùn duverebbe minaccià u francese, nò ? » Spieca torna qualchì verità : « a cuufficialià ùn hè micca sinònimu di bislinguìsimu », ma « per ghjunghje à un bislinguìsimu suciale, bisognu ci hè di a cuufficialità ». Ramenta chì « senza cuufficialità, a lingua corsa ùn puderà campà, sviluppassi, cresce, addattassi, tramandassi ! »
Eppò vene à parlà di l’argumenti ecunòmichi è prufessiunali, nant’à u prezzu di u monolinguìsimu per un dettu, è per risponde à quelli chì dìcenu ch’ellu costerebbe caru u plurilinguìsimu.
Ammaestrà una lingua, hè cumpetenza per Rumanu Colonna chì risponde dinù à e gattive raprisentazione di a lingua è à l’edee false. Innò ùn hè micca discri minatoria a cuufficialità! Innò ùn hè micca periculosu u bislinguìsimu, eccèttera… Argumenti filusufichi è pulìtichi cundùcenu à a cuufficialità. Capitale cumunu, libertà, parità, orizontalità, ricunniscenza, equillìbriu, drittu, citatinanza, pluralità… ùn màncanu i puntelli di l’effetti pusitivi di a cuufficialità nant’à l’urganisazione di una sucetà. Infine, argumenti ghjurìdichi ben intesi, è stituziunali. U drittu internaziunali a dice, ma ancu u drittu francese duverebbe purtà à ssa cunclusione !
Ma quì ùn si pò dì tuttu, cù a cinquantina d’argumenti ch’ellu svilupeghja Rumanu Colonna, ùn si pò parà a cunclusione ch’ellu pone in forma di dumanda : « sò à favore d’un statutu di cuufficialità pè a lingua corsa è a dicu. È voi ? »
Eccu, cumprate ssu libru è aiutèmuci à strappà ssu drittu à a cuufficialità !
Fabiana Giovannini.